Ataúru (timorpost.com) — Kompetisaun nani iha eventu Festivál Múzika no Kultura Ataúru, primeiru lugar feto ho mane okupa hosi Baukau-oan.
Iha parte feto nian ho metru 100 no mane nian mak metru 200, kona-ba metru husi feto ho mane sei nani dala rua, parte primeira mak semi finál ho finál.
Tuir observasaun Timor Post Online, iha kompetisaun nani ne’e joven Baukau oan ho naran kompletu Imelda Felicyta Ximenes Belo, ne’e semi finál mós nia okupa Primeiru Lugar no finál mós nia kontinua okupa nafatin Primeiru Lugar.
“Ha’u sente orgullu husi esforsu Governu nian, tanba sira halo komunidade sira bele partisipa iha eventu rasik. Nune’e eventu ne’e mós kapás tebes tantu Timoroan no ema husi li’ur sira mai,” Felicyta dehan ho kontente hafoin sai husi Nani Tasi iha Portu Beloi, Kuarta (23/11).
Nia dehan, foin primeru-vez Governu realiza iha Ataúru, husi ne’e munisípiu ne’e mós hanesan illa ne’ebé dook husi kapitál, tan ne’e hanesan nasaun Demokrátiku ida hatudu duni promove kulturál tasi nian iha Ataúru.
“Maibé ha’u la’ós Ataúru oan, ha’u ema Baukau, ha’u-nia mensajen ba futuru oin mai, ha’u sujere ba kolega sira ne’ebé sai segundu lugar to’o kuartu lugar hodi halo di’ak liután, tanba sei iha futuru inklui tan ho ema li’ur sira,” nia hameno.
Nia aumenta, ida ne’e foin primeru-vez tanba ne’e halo rejistrasaun ne’e fó espasu ba de’it Timoroan, tanba ne’e tuir nia hanoin kona-ba iha tinan tuir karik realiza tan se bele ho estranjeiru sira.
“Tanba ida ne’e hanesan ita promove kultura ba sira, tanba ita la hatene ka lae, iha aban-bainrua mai sira mós bele iha tarjetu atu mai inskrisaun atu bele halo netik buat ruma ba ita,” nia hakotu.
Entretantu iha fatin hanesan kompetisaun Nani ho kategoria mane grupu A okupa husi atleta, Afonso Soares, mak sai hanesan vensedór ho metru 200.
“Ha’u sente kontente, tanba foin primeiru-vés tuir kompetisaun Nani no hetan kedas juara satu,” hateten Afonso.
Nia hatutan, iha kompetisaun nani ne’e kole iha lima no ain, maski iis sufisiente hela, maibé liman no ain kole sei labele halo buat.
“Kole liu mak liman no ain, tanba sira rua mak servisu makaas liu kompara ho sira seluk,” tanba ita nia ain tenke tebe, liman tenke baku ba oin,” haktuir nia.
Nune’e segundu lugar, Jeremias de Andrade, hatete nani ne’e presiza forsa husi liman no ain.
“Save mak ita-nia liman, ain de’it, ha’u koko duni atu duni ida primeiru ne’e, maibé labele tanba kole, iis sei bertahan hela maibé liman, ain mak labele,” esplika nia.
Portantu, vensedór primeiru lugar, Afonso Soares, servisu hanesan peskadór ho idade 27 no segundu lugar, Jeremias Andrade, ho idade 35, hanesan mós peskadór.
Entretantu iha kompetisaun nani, kompostu husi ema nain-11, kategoria mane ekipa A, B no C. Nune’e mós feto husi A, B no C iha kompetisaun refere.
5,571 total views, 3 views today
Bele hare Video Seluk :
Subscribe to Timorpost
