DILI (timorpost.com) — Ekipa konjuntu kompostu husi Polisia Nasionál Timor-Leste (PNTL) Munisípiu Ainaru, Autoridade Protesaun Sivíl (APS), Autoridade Lokál no Grupu Juventude sira iha Munisípiu Ainaru, kontinua buka joven na’in-rua ne’ebé lakon iha Ramelau.
Komandante PNTL Munisípiu Ainaru, Superintendente Xefe Polisia Paulino Carmo Pereira, informa hafoin sira-nia parte simu informasaun, Ekipa konjuntu kompostu husi PNTL Munisípiu Ainaru, Autoridade Protesaun Sivíl (APS), Autoridade Lokál no Grupu Juventude sira iha Munisípiu Ainaru, buka joven na’in-rua ne’ebé lakon iha Ramelau.
“Ami PNTL Munisípiu Ainaru, eskuadra Hatubuiliku ho Autoridade Protesaun Sivíl (APS), Autoridade Lokál no Grupu Juventude sira iha Munisípiu Ainaru no família sira, inan-aman, komesa Domingu, Segunda no Tersa, ho esforsu tomak buka joven na’in-rua ne’e, maibé ita seidauk simu informasaun ruma no seidauk hetan joven na’in-rua ne’ebé lakon,” nia hateten ba Timor Post liuhusi telefone, Tersa (14/02).
Nia dehan, ekipa konjuntu daudaun ne’e sei buka hela, tanba tuir lia Na’in katak joven na’in-rua nia pozisaun ne’e besik Nain Feto Ramelau.
“Tanba ne’e, ekipa konjuntu ho esforsu tomak sei kontinua buka hela, tanba tuir ritual balun ho katuas lia Na’in sira halo predisaun ba sira-nia paradeiru ne’e sinál di’ak hela, katak na’in-rua nia padeiru ne’e sei iha area Nain Feto Ramelau, tanba ne’e ho esforsu tomak sei kontinua buka tuir hela,” nia konta.
Tanba ne’e, ohin loron Tersa (14/02) lia Nain sira kontinua halo lulik tanba, hodi buka tuir joven na’in-rua, tanba to’o agora seidauk hetan.
“Evidénsia motor, kapasete, lona camping nian no masa água nanotak, daudaun ne’e ita foti ona, mai rai iha eskuadra Hatubuiliku nian,” nia hakotu.
Enkuantu, tuir informasaun ne’ebé família sira sita iha media sosiál Facebook, katak iha loron Kinta (18/02) joven mane na’in-rua ho naran Leandro Falo ho Orlando Martins, utiliza motor privadu ho marka Genio, kór-metan, xapa matríkula S 6898, viajen husi Dili, atu ba vizita Nain-Feto Ramelau, Iha Postu Administrativu Hatubuiliku, Munisípiu Ainaru.
1,591 total views, 3 views today
Bele hare Video Seluk :
Subscribe to Timorpost
