DILI (Timor Post)—Sekretáriu Estadu Peskas (SEP), Elídio de Araújo, ofisialmente kolleta ikan hanaran Ikan Bee Midar iha Maubisse no “Lagoa ERHEU” aldeia Baha, suku Foho-Ai-Lico, Postu Administrativu Hatu-Udo, Munisípiu Ainaro.
Komunikadu ne’ebé Timor Post assesu haktuir serimónia ne’ebé hala’o iha Sesta (30/07/2021) ne’e, ho intensaun promove setór agrikultura hodi atinji metas governu katak, to’o tinan 2023 ema hotu iha Timor Leste bele konsumu ikan ho fasil.
Iha okajiaun, Sekretáriu Estadu Elídio, aprezenta mós programa sosa ró komersial peska boot rua ho ró fiberglass hamutuk unidade 110 no kada munisípiu sei hetan unidade 10 inklui Munisípiu Ainaro, hodi responde preokupasaun ne’ebé sira hasoru durante ne’e. Presiza mós formasaun iha area tékniku, jestaun negósiu nune’e bele hadi’a sira nia moris iha futuru.
Elídio agradese ba grupu hakiak na’in sira, liu-liu grupu hakiak Ikan Bee-Midar, ba sira nia esforsu tomak.
“Ha’u apresia tebes ba imi nia grupu tanba iha ona rezultadu kolleta no kontinua apoiu dezenvolve setór agrikultura hodi hasa’e komunidade sira nia rendimentu ekonomia,” Elídio subliña.
“Iha ha’u- nia mandatu, ha’u sei promove setór agrikultura no peska hodi garante seguransa ai-han no fornese alimentu ida ne’ebé adekuadu ba ita nia saúde,” hatutan nia.
Governante ne’e husu ba hakiak ikan na’in sira no komunidade, atu aproveita oportunidade ne’e ho didi’ak hodi elabora no motiva nafatin, nune’e bele asegura atividade sira ne’e hodi fó benefísiu povu iha future.
Entretantu, iha biban ne’e, Administradór Munisípiu Ainaro sente kontente tanba Sekretáriu Estado Peska konsege lori programa VIII Governu konstitusional RDTL, ne’ebé ho lema hakbesik-an ho ninia povu Foho-Ai-Lico no oinsá sira bele iha koñesimentu kona-ba dezenvolve setór agrikultór, nune’e bele hasae kresimentu ekonomia iha rai laran, liu-liu povu Hatu-Udo.
Portantu, lansamentu ne’e akompaña hosi Xefe Gabinete Sekretáriu Estadu Peska, Francisco da Silva Costa, Asesór Legal, Hermenegildo Magno Gomes, Diretór Jerál Peska no Agrikultura Rekursu Marinus (PARM), Acacio Guterres, ho komitiva tomak, hetan partisipasaun hosi Sekretariu Estadu Kooperativu (SEKoop), Elizario Ferreira, no autoridade lokál nivel munisípiu, postu administrativu Hatu-Udo, no suku inklui mós komunidade no membru grupu hakiak ikan bee-midar.
Iha fatin hanesan, reprezentante xefe grupu hakiak ikan mós agradese ba SEP ho ninia ekipa tomak, ne’ebé durante ne’e oferese ona fini ba sira hodi hakiak.
“Durante seis mezes nia laran ami hakiak no ohin loron dia 30 Jullu 2021 iha rezultadu kolleta,” nia agradese. (*/fer) Lee notisia seluk iha Jornal Timor Post
1,368 total views, 6 views today
Bele hare Video Seluk :