MANUFAHI—Katuas ida ho naran Lúcio da Conceição Mendes ho idade 62 baku fila ho karreta marka 4K iha loron Sesta (26/02/2021) no Bombeiros foin evakua isin mate iha loron Segunda (01/03/2021).
Ekipa Bombeiros ba hiit mate isin iha mota laran sukat husi estrada ba liu metru atus rua, iha área Lihulolo, Aldeia Betulala Suku Aitutu Postu Administrativu Maubisse, Munisípiu Ainaro. Área ne’e besik matebian Carlito Pinheiro, Administrador Munisipíu Manufahi ho família monu iha tinan 2018.
Membru ida husi korpu bombeirus Munisipíu Manufahi, Rodolfo Mesquita ba Timor Post haktuir, Lúcio husi Postu Administrativu Maubisse. Tuir informasaun husi komunidade katak akontesimentu ne’e mosu iha Sesta maibé sira foin rona iha Segunda no halo kedas intervensaun matebian nia kondisaun iis ona.
“Ami rona informasaun ohin meudia (Segunda) entau ami ba lori ho ekipamentus hodi foti mate isin iha oras 17.19 OTL,” Rodolfo via telefone hafoin halo evakuasaun.
Nia haktuir, ekipa bombeiros akompaña husi polísia tula kedas mate isin iha karreta funerariu Munisípiu Manufahi nian lori ba entrega ba família matebian iha Maubisse.
Tuir informasaun ne’ebé jornalista rekolla iha tereinu katak, matebian Lúcio sai husi uma iha loron sesta ho kareta ba suku Holarua, Postu Same la fó hatene ba família.
Liu tiha loron haat maka komunidade iha área ne’eba foin hetan matebian ho karreta iha motalaran no halo kedas kontaktu ho família no autoridade sira hodi ba halo evakuasaun.
Jornalista Luis Casimiro Lopes
Editór Noémio Falcão
347 total views, 3 views today
Oinsa Ita nia Reaksaun iha Notisia Nee?
You have reacted on "Lúcio Baku Fila iha Sesta, Segunda mak Bombeir..."
