DILI (Timor Post)-Ekipa PDHJ DT Same hala’o Monitorizasaun Estadu Emerjénsia ba dala sanulu resin 17 iha Munisípiu Aileu. Iha observasaun ne’e nota katak negosiante sira barak maka preokupa liu kona-ba sira nia rendimentu.
Ofisial Fiskalizadór halo entrevista ho João Tilman de Araújo husi suku Liurai Postu Administrativu Aileu Vila, nu’udar negosiante Roupa Obralan (OB), Negosiante ne’e hatete, durante Estadu Emerjénsia sira nia rendimentu ne’e tun tebe-tebes, tanba ema atu sosa roupa sira laiha.
“Ami kréditu osan iha KAEBAUK maka sosa obralan hodi fa’an la’ós hodi modal rasik se ida ne’e mak EE ne’e la para oinsá ho ami nia rendimentu loro – loron nian,” dehan negosiante João ba ofisial Fiskalizador.
Negosiante ne’e halo komparasaun ho tinan hirak liu ba antes ita tama ba Estadu Emerjénsia kuandu sira loke ona obralan saku boot ne’e ida loron rua selae semana ida hotu ona mais agora lae fulan rua atu ba fulan tolu tan mós dala ruma la hotu.
Ida ne’e implikasaun boot tebes ba negosiante sira tanba sira kréditu osan $800 dollar iha KAEBAUK no kada fulan sira setór fali $80.00 dollar maibé durante ne’e sira dala ruma fulan ida setór de’it $40.00 dollar ne’ebé sorte di’ak tanba KAEBAUK sei fó mós espasu hodi sira fa’an lai roupa hotu maka ba setór halo kompletu.
Bainhira Ofisial Fiskalizadór DT Same husu kona-ba nia negósiu obralan ne’e rejista ona Iha Ministériu Solidariedade Sosiál (MSS) bazeia-ba Lei no.8/2021. 3 Maiu ne’ebé ko’alia Kona-ba Pakote Rekoperasaun Ekonomia, Joao Tilman Informa katak durante ne’e nia parte la hatene kona-ba Prosesu ne’e no husi MSS no husi Suku rasik mós la fahe informasaun ba sira.
Iha tempu hanesan, ofisial Fiskalizador hala’o kedan Konfirmasaun ba Diretór MSS Munisípiu Aileu, Emanuel de Araújo Barros maibé Funsionáriu Kazuais/Voluntáriu iha Ministériu Solidariedade Sosiál (MSS) Munisípiu Aileu, Eliana Sarmento, informa katak diretór MSS Aileu laiha fatin.
Observasaun jerál iha Munisípiu Aileu Vila hatudu katak atividade servisu Públiku sira no atividade vendedóres no comprador sira iha Munisípiu Aileu la’o normal hela. (*/teu)
700 total views, 3 views today
Bele hare Video Seluk :