Mudansa Estrutura iha FRETILIN Signifika Transferénsia Poder, “Hadi’a Partidu La’ós Tuir Ema Seluk”

by -2.867 views
Sekretáriu Jerál FRETILIN, Marí Bim Amude Alkatiri

Dili (Timor Post)—Partidu FRETILIN hala’o namanas konferénsia nivel munisípiu. Iha Manufahi, Sekretáriu Jerál FRETILIN, Marí Bim Amude Alkatiri subliña mudansa estrutura iha partidu laran.

Alkatiri hatete, mudansa estrutura signifika transferénsia poder, nune’e husu ba kamarada hotu ne’ebé hetan poder atu hadi’a lalaok partidu ba oin la’ós atu halo tuir fali ema seluk nia hakarak.

“Lideransa presija muda mentalidade atu iha vizaun no tenki iha sentidu responsabilidade,” Alkatiri afirma kestaun ne’e bainhira partisia iha konferénsia FRETILIN dalima iha Munisípiu Manufahi, iha loron 20/11/2021.

Konferénsia ho tema “REUNIR PARA DESENVOLVER” (Halibur atu Dezenvolve) ne’ebé hala’o iha salaun Parókia Nossa Senhora de Asunção Same-Vila ne’e, Alkatiri apela ba timoroan tomak atu hamutuk lori dezenvolvimentu ba povu no nasaun.

Konferensista sira mai husi husi postu administrativu-haat inklui Alas, Fatuberliu, Same no Turiskai.

“Denvolvimentu atu ema hotu bele hetan moris di’ak no dignu, hodi sai husi ki’ak no nakukun laran,” Alkatiri subliña.

Durante iha Manufahi, Alkatiri toka mos kona-ba FRETILIN nia partisipasaun iha governu daualu lideradu Primeiru Ministru Taur Matan Ruak. Nia dehan, FRETILIN nia partisipasaun hamosu mudansa barak.

“Governu ida ne atu investe iha edukasaun, saúde, iha juventude, atu nune ita nia jerasaun mai ne’e matenek duni, ne’e mak governu ida ne’e halo. Halo Timor-Leste atu sai nasaun ne’ebé mak la depende lós de’it ba importasaun husi rai liur,”  Alkatiri komenta.

Alkatiri mós salienta,  bainhira FRETILIN deside viabiliza governu konstitusional daualu tanba hakarak hakotu impasse polítika ne’ebé naruk.

“Ita ba viabiliza governu ida ne’e atu hakotu impase polítika no hatudu ba povu tomak katak rai ida ne’e nia nain maka ita hotu, la’ós ema ida de’it,” Alkatiri afirma.

Entretantu rejultadu husi konferénsia iha Manufahi, konferesista sira kontinua hili Adriano Corte-Reál sai hanesan koordenador FRETILIN Munisípiu Manufahi ba periodu tinan 2021-2026.

Konferénsia iha Manufahi primeiru véz iha prosesu kandidatura avansa ho pakote-2, kandidatu Adriano Corte-Reál ho strutura tuan sira avansa ho pakote (A) hetan votu maioria ho votu 262, husi totál votante 207, foinsa’e Gregóriano Piadade de Fátima ho strutura jerasaun foun sira avansa ho pakote B hetan votu 45.

Iha abertura konferénsia Alkatiri hatete, konferénsia munisipal tuir loloos hala’o ona iha tinan kotuk iha Munisípiu hotu inklui RAEOA, maibé tanba relasiona situasaun polítika iha rai laran inklui pandémia covid-19.

Alkatiri dehan, konferénsia munisipal ne’e importante hodi haforsa estrutura partidu nian iha báze, hodi lori FRETILIN hetan vitória iha eleisaun prezidensiál tinan 2022 no eleisaun parlamentár 2023. (cao)

No More Posts Available.

No more pages to load.