Muda Kedas Sistema Pagamentu Susbsídiu ba Ferik-Katuas

by -561 views

Timor Post (23/12/2020)—Prezidente Partidu Demokrátiku (PD), Mariano Assanami Sabino husu ba Banco Nacional Comerçio Timor Leste (BNCTL) atu muda kedas sistema pagamentu subsídiu ba ferik-katuas sira tanba sistema ne’ebé dadauk uza fraku tebes.

Assanami husu ba mídia sira atu fó solidariedade ba akontesimentu katuas ida mate no husu atu BNCTL tenke prepara karreta movel atu halo pagamentu besik ba ferik no katuas sira.

“Mídia hotu-hotu tenke fó solidáriu ba ita nia aman ne’e, i husu para tenke hadi’a sistema, BNCTL tenke iha karreta movel atu halo pagamentu,” Assanami subliña ba Jornalista sira hafoin rona katuas ida ho naran Agostinho Moniz mate hafoin sena malu ba simu osan iha BNCTL.

Assanami dehan, BNCTL ne’e banku governu nian, tanba ne’e tenke kompleta fasilidade hotu atu serví povu ho di’ak liu.

“Ita defende filozofia ba ferik-katuas sira mak, too ona 60 anos, sira sai eroi ba nasaun tanba sira konsege hakiak i konsege kuidadu bebe oan ida sai joven no sai lider, tanba ne’e mak orgullu ba sira i fó rekoñesimentu nu’udar eroi mak ita fó terseira idade,” Assanami afirma.

Entretantu Agostinho Moniz hakotu iis loron 22/12/2020.

“Nia monu iha sexta-feira ne’e, antri iha banku sira lori ba iha ospital maka mate,” Xefe Suku Mascarenhas, Postu Administrativu Vera Kruz, Munisípiu Dili, Rui Ilídio de Araújo haktuir ba Timor Post via telefone.

Tuir Xefe Suku, fator dahuluk Agostinho nia mate tanba idade. “Nia iha oan no beioan,” Xefe Suku hatete.

Maske nune’e, Xefe Suku kestiona meius sira halo pagamentu ba benefisiáriu sira.

“Iha Vera Kruz ba simu idozu ho bolsa da mãe, problema mak ida ne’e,” Xefe Suku kestiona hodi haktuir, iha Vera Kruz, tanba mosu ona problema katuas-ferik sira sena malu maka muda fali pagamentu husi banku ba iha postu administrasaun.

Vídeo amador ne’ebé sai viral iha rede sosial hatudu ferik ho katuas sira sena malu maka’as tebes iha BNCTL. Vídeo ne’e hatudu seguransa sira dudu malu ho ferik-katuas sira hodi mantein orden servisu, maibé ferik katuas sira kontinua obriga tama no balu haksoit husi lutu.

Observasaun haktuir pagamentu subsídiu ba ferik katuas iha timor laran hamosu preokupasaun husi benefisiáriu sira tanba to’o loron ne’ebé sira ba simu subsídiu ne’e tenke la’o dook. Balun la’o husi suku ida ba simu iha suku seluk no pior liu maka ferik-katuas balun nia kondisaun saúde no fízikamente labele la’o ona, mós obrigadu oan no beioan sira dudu ho kadeira roda, karrosa ho meius transporte seluk ba fatin ne’ebé pesoal sira halo pagamentu. (cao)

No More Posts Available.

No more pages to load.