MTKI-PNUD Lansa Kompetisaun Negósiu Inovativu

by -360 views
Publisidade

DILI (Timor Post)—Ministériu Turizmu, Komérsiu no Indústria (MTKI) parseria ho Programa Nasoens Unidas ba Dezenvolvimentu (PNUD) iha Timor–Leste no Instituto de Apoiu e Dezenvolvimentu Emprezariál (IADE), ofisialmente lansa kompetisaun ‘Negósiu Inovativu’, ne’ebe ho tema “Haburas Empreendimentu Inovativu Ba Rekuperasaun Ekonomia”.

Vise Ministru Komérsiu Indústria, Domingos Lopes Antunes, hateten objetivu husi kompetisaun refere, mak atu enkoraja joven produtivu no kreativu sira ne’ebé ho idea negósiu innovativu, hodi kria servisu ba sira nia aan liu husi fortalesimentu empreendedorismu no ekosistema inovasaun inklui envolvimentu joven sira iha prosesu rekuperasaun ekonomia.

Tanba, tuir MTKI nia haree, katak impaktu husi Pandemia Covid-19 no mós kalamidade inundasaun (floods) iha 04 Abril ne’e, Timor-Leste hasoru problema boot no oin-oin tantu interna no esterna.

“Maibé mós fó oportunidade ba ita atu hanoin ba dezenvolvimentu ho modalidade foun ne’ebé prioritize ba dezenvolvimentu sustentavel, liu-liu foka ba planeta (planet), ema (people) no prosperiedade (prosperity),” Vise Ministru Komérsiu Indústria, Domingos Lopes Antunes hatete iha salaun Delta Nova, Sesta (17/09).

Tanba iha polítika VIII Governo Konstitusional liu husi MTKI, nia hateten, kria Programa Kompetisaun Negósiu Innovative hodi oferese oportunidade ba joven tantu indivídu, grupu no kooperativa ne’ebé mai ho idea negósiu iha setór prinsipál sira,hanesan agrikultura & peska, turizmu, indústria no manufatura, teknolojia, inovasaun no jestaun lixu.

Governante ne’e fiar, katak ho programa prioridade ida ne’e, bele ona redús taxa dezempregu liu husi dezenvolvimentu setór privadu ne’ebé úniku no inovativu.

Portantu, liu husi Programa Kompetisaun Negósiu Innovative ida ne’e, ekipa de jury sei selesiona joven kreativu hamutuk 40, ne’ebé mai husi Munisípiu 12 inklui Rejiaun Administrativu Espesial Oekusi-Ambenu (RAEOA).

Joven sira ne’e, sei partisipa iha bootcamp/semináriu emprezariál, ne’ebé sei realiza iha dia 18-20 fulan Outubru 2021, depois de bootcamp, joven 40 sei aprezenta sira nia idea negósiu ba ekipa de jury sei selesiona joven 10 ne’ebé sei reprezenta joven 40 iha Final Pitching/aprezentasaun ne’ebe sei realiza iha dia 25 fulan Outubru 2021.

Depois de final, MTKI se’i servisu hamutuk ho Banku Nasionál Komérsiu Timor-Leste (BNCTL) atu bele transfere orsamentu ba iha konta bankária husi joven 10 inklui 30 ne’ebé partisipa ona iha bootcamp. Orsamentu refere sei aloka liu ba kapitál investimentu servisu, nune’e bele hahú sira nia negósiu.

Portantu, MTKI, PNUD no IADE se’i oferese mós Programa Inkubasaun Negósiu ba joven 40 ne’ebé asesu ona ba ekipamentu ne’ebé fornese liu husi Kompetisaun Negósiu Inovativu.

Estabelesimentu Inkubasaun Negósiu Timor-Leste hanesan espasu ida ne’ebé dezeña atu fasilita emprezáriu Timoroan, liu-liu joven sira ne’ebé mai ho idea negosiu innovative atu dezenvolve sira nia negósiu no fatin hodi inkuba joven sira sai emprezáriu ne’ebé susesu no prepara mós sira atu asesu ba Fasilidade garantia Kréditu Suave.

Aleinde ne’e, PNUD Regional Asia Pasífiku liu husi Programa Youth Co:Lab se’i oferese asisténsia ba Joven selesionadu atu asesu ba akonsolamentu negosiu/ Business Mentoring, ligasaun negósiu (Business networking) no koneksaun ho investor iha Nasaun Asia.

Liuhusi parseria entre MTKI, PNUD no IADE sei mellora liu tan apoiu ba emprezáriu joven sira liu husi Centro Integradu ida ne’ebé innovative no sei akumula programa no instituisaun hotu.

Ne’ebé servisu relasiona ho emprezariál hanesan SERVE, CCI-TL, liña ministerial no parseiru dezenvolvimentu sira iha fatin ida ne’ebé adekuadu ho teknolojia modernu no se’i liga mós investor internasionál sira hanesan Angle Investor no seluk tan.

Ministériu Turizmu, Komérsiu e Indústria mós estabelese ona Programa Fasilidade Garantia kréditu Suave (Soft Loan) hodi fó biban ba Mikro, Pekenas no Mediu Empreza.

Ne’ebé foin hahú (start-up) no eziste atu asesu ba finanseiru liu husi kreditu suave iha BNCTL ho jurus 3% kada tinan, no períodu grasa durante fulan 3 – 6. Programa ne’e realiza tanba servisu hamutuk entre MTKI, UNDP, BNCTL no IADE.

MTKI fiar, katak joven no mós empreza mikro, pekena no media mak nu’udar pillar importante hodi kontribui maka’as ba dezenvolvimentu no kresimentu ekonomia Timor-Leste nian.

“Husu ba ita boot sira, foti oportunidade ne’ebé governu no parseiru dezenvolvimentu oferese ne’e, hodi dezenvolve di’ak liu tan ita boot sira nia negósiu,” nia husu.

“Hato’o ba ita boot sira atu partisipa másimu iha kompetisaun innovative ida ne’e, atu bele hatudu ba komunidade nasionál no mós internasionál, katak joven no MPMEs Timor -Leste nian iha kreatividade no mós inovasaun no bele kompete iha merkadu Nasionál no mós merkadu Internasionál.” (jho)

No More Posts Available.

No more pages to load.