MS-Universitáriu Tenke Sosializa Variante Delta

by -146 views
Dekanu fakuldade saúde públiku UNDIL Ivo da Costa. (Foto TP/Amélia Babo)

DILI (Timor Post) – Dekanu fakuldade saúde públiku Universidade Dili (UNDIL), Ivo da Costa Soares husu ba Ministériu Saúde (MS) atu koopera ho universidade hotu liuliu fakuldade saúde públiku nia estudante finalista sira atu bele ba halo sosializasaun ba variante Delta.

Ivo hatete, sosializasaun ba komunidade sira atu nune’e bele hatene informasaun no bele uza rasik sira ninia konxiénsia la’o iha dalan públiku liuliu uza máskara, fase liman no distánsia fíziku, tanba agora daudaun komunidade barak la halo prevensaun ba sira ninia-an rasik.

“Variante Delta ne’e iha nasaun seluk ema mate barak liuliu Indonézia, agora mak ita la halo prevensaun iha futuru bele sai at liu tan. Situasaun agora liu-liu variante Delta ne’e perigu tebes ba ema hotu”, hatete Ivo ba Timor Post iha ninia knar fatin UNDIL Maskarinas, Segunda (26/07).

Tanba ne’e, ministériu hotu-hotu tenke servisu hamutuk hodi kombate lalais variante Delta ne’e. Tanba variante Delta mai husi nasaun seluk no Parte seguransa sira tenke kontrola másimu iha area fronteira nian.

Dekanu ne’e haktuir, atu nune’e sidadaun sira labele tama iha área fronteira Atambua no Indonézia lori virus mai iha Timor-Leste. Governu presiza regra rigorozu ema ne’ebé tama sai iha área fronteira tenke hetan no aplikasaun ba nia selu ka tama selu para futuru bele domíniu ema labele tama sai.

“Ita hotu asiste katak variante ne’e moras ida ne’ebé perigu, tanba ne’e mak Ministériu Saúde koopera hamutuk ho universidade hotu-hotu liu-liu fakuldade saúde públiku liu-liu estudante oinsá maka ministériu utiliza estudante sira atu halo sosializasaun ba komunidade kada aldeia ka bairru para ema hotu bele uza máskara fase liman no distánsia fíziku iha fatin públiku,” nia dehan

“Ita asesu iha media Ministra Saúde dehan estudante sira ba eskola no iha fatin públiku la uza máskara, tanba ne’e maka MS tenke halo kooperasaun di’ak ho parte universitária nian”, hatutan nia.

Dekanu Saúde públiku ne’e hatete, kompara ho nasaun seluk ne’ebé akompaña husi media katak, Mister Luhu halo kooperasaun ho universidade atu utiliza estudante sira ne’ebé finalista iha universidade kona-ba saúde públiku nian, sira bele halo sosializasaun ba komunidade iha suku atu bele halo prevensaun ba Covid-19 inklui variante ne’e.

“Se ita moris ho situasaun hanesan ne’e de’it oinsá mak ita bele halo prevensaun ba iha futuru. Estudante saúde públiku sira iha universidade iha vontade atu servisu hamutuk ho ministériu saúde,” nia kestiona

“Ita atu diminui ka halo prevensaun ita hotu fó liman ba malu maka bele hetan solusaun la’ós ministériu saúde de’it, maibé ministériu hotu-hotu atu suporta servisu ministériu saúde nian atu rekruta estudante finalista sira iha saúde públiku nian atu bele observa iha terenu,” dehan dekanu ne’e.

Nia hatete, estadu Timor-Leste labele halimar ho variante foun ida ne’e, tanba Delta ne’e perigu uluk iha ema nia rai ta’uk agora eziste ona mós la hakfodak sá tan eskola komesa hahú ona, presiza halo prevensaun importante ba ita ninia saúde.

“Tanba moras ne’e mai la haree ba ema, maibé kona tiha ita mak hakfodak, tanba ne’e mak Ministériu Saúde tau orsamentu atu rekruta tan pesoálsaúde barak atu servisu iha pontu entrada sira ne’ebé ema tama sai no halo momentu rame atu nune’e bele halo teste hodi hatene rezultadu”, haktuir tan nia.

Nia sujere, atu hetan solusaun ba problema sira ne’e ministériu relevante tenke presiza tau atensaun maka’as atu bele liu-husi prevensaun taka fronteira terestre no area portu tau prioridade de’it ba nesesidade báziku atu bele responde ba preokupasaun ema nian.(asb)

No More Posts Available.

No more pages to load.