MS Inaugura Uma Emerjénsia Foun SS Komoro

by -309 views
Foto Midia Embaixada Australia

DILI (Timor Post)—Ministériu Saúde hamutuk ho parseiru sira inaugura uma emerjénsia ne’ebé mak hetan tulun hosi komunidade Australianu sira ba Sentru Saúde (SS) Komoro.

Uma emerjénsia ne’e rasik hodi atende pasiente ne’ebé ba ho emerjénsia, nune’e pasiente sira bele deskansa hodi hein tratamentu saúde hosi pesoál Saúde sira.

“Sala Emerjénsia ida uluk ne’e ita haree ki’ik demais no fatin ne’ebé ligadu ho SSK ne’e rasik la iha ona espasu, tanba ne’e mak presiza halo manutensaun no renovasaun, atu nune’e ita nia pasiente sira mai bele hetan atendimentu ne’ebé di’ak no dignu”, reprezentante Embaixadór Austrália iha Timor-Leste Carli Shillito, ba jornalista sira hafoin remata serimónia inaugurasaun uma emerjénsia foun iha SS Komoro, Sesta (01/10).

Nia dehan, sala emerjénsia anteriór, ministériu saúde rasik mak identifika, katak iha problema, tanba ne’e parseiru sira iha planu hodi hadi’a fasilidade ne’e.

“Iha prosesu harii fatin foun ne’e, Governu hola fali propriedade komunidade nian balun ne’ebé la uza ona. Tanba fatin refere identifika hanesan fatin ne’ebé mak di’ak hodi konstrui fila-fali sai sala emerjénsia”, nia subliña.

Iha fatin hanesan, Diretora Servisu Saúde Munisípiu Dili, Agostinha da Costa S. Segurado, hatete SS Komoro ninia sala emerjénsia klaru ho espasu ne’ebé limitadu, maibé la’ós SS Komoro de’it iha mós sentru saúde Formosa presiza iha atensaun hosi governu.

“Pedidu ba iha Governu nian, ita iha kedas planu antes ona iha tinan 2018, maibé pedidu ba ema ajénsia sira ita tenke haree bainhira sira iha kooperasaun ho ita, ita bele fó oportunidade ba sira hodi apoiu ita”, Agostinha subliña.

Enkuantu, Ministra Saúde, Odete Maria Freitas Belo, hatete apoiu ne’ebé parseiru sira apoiu, la’ós apoiu gratuita de’it, dala-ruma ema ko’alia dehan estadu kontinua tane liman, maibé la fasil atu tane liman.

“Ita tane liman la’ós ha’u tuur ba husu de’it, ne’e lae, maibé ha’u nia ema ne’ebé servisu iha saúde tenke preparadu no tenke hamutuk, ha’u nia planu ema ida idak iha nia planu, bainhira ita laiha planu ema doadores sira susar atu fó apoiu ba ita, maibé ha’u atu dehan bainhira ita kuandu tane liman ne’e hatudu katak, ita saúde nia koordenasaun no servisu hamutuk iha ne’ebá”, Governante hatete.(res)

No More Posts Available.

No more pages to load.