MS Kontrata Funsionáriu Na’in-141 ba Iha Programa Malaria, HIV-SIDA no TBC

by -695 views
Funsionariu kontratadu sira foto hamutuk hafoin asina kontratu ho Ministeriu Saude,iha Palácio Cinzas, Kaikoli, Sesta (01/04). Imajen TP/mariano abi

(Reportajen Estaziadu Mariano Abi/Asistente Editor Hermenegildo da Costa Tilman)

Dili (Timor Post)–Ministériu Saúde (MS) liu hosi apoiu fundu global, kontrata funsionáriu na’in-114 hodi reforsa implementasaun programa tolu hanesan programa Malaria, HIV-SIDA no Tuberkulozu (TBC)

“Tinan ida ne’e, ita halo kontratu ba sira hamutuk 141, hodi serbisu ba programa Tuberkulozu, Malaria no HIV SIDA, iha 12 munisípiu inklui RAEOA,” Diretór Nasionál Rekursu Agusto Joaquim Pinto, afirma ba jornalista sira iha Palácio Cinzas, Kaikoli, Sesta (01/04).

Nia hatete, iha RAEOA nian MS halo tiha ona iha semana rua liu ba, depois ohin ne’e ita halo iha munisípiu Dili, ho serbisu sentrais no serbisu autónomu laboratóriu nasionál, semana oin sei kontinua halo mós iha munisípiu sira seluk, atu bele kompleta 141.

Kontratu ajente administrasaun ne’e, halo ba tinan ida, maibé hanesan serbisu MS ho akordu inter ministeriál, funsionáriu iha Ministériu Saúde ne’e, iha rejime rua, rejime karreira jerál no rejime karreira espesiál.

dezde akordu Ministerial ho Estatál, ba rejime Jerál sira ne’e, responsabilidade husi kada munisípiu ka Instituisaun ne’ebé halo ninia kontratu, maibé Ministériu Saúde responsabiliza ba sentrais no hospital ho rejime espesiál sira, ne’ebé mak serbisu iha territóriu tomak,” nia dehan.

“Ba kolega sira ne’ebé ohin asina ne’e, ita bolu ajente Administrasaun Publika, ne’ebé seidauk tama ba kategoria permanente, tanba kuandu funsionáriu permanente sei iha prosesu boot ida,” nia relata.

Iha sorin seluk hanesan, Administradór Divizaun Fundu Global, Noé Gaspar, haktuir, komesa tinan ida ne’e ba oin, funsionáriu sira ne’ebé mak finansia husi fundu global, sei transfere ba serbisu iha sistema saúde, hodi reforsa implementasaun programa saúde, ho ida ne’e, bele garante sustentabilidade programa saúde nian iha futuru.

Bazeia ba akordu kometimentu ne’e, liu husi Ministériu Saúde ne’ebé mak rekruta sira, hodi tama ba sistema Governu nian, hanesan funsionáriu kontratadu, depois sei iha prosesu administrasaun iha futuru, karik sira bele hakat ba aplikasaun tuir prosesu ne’ebé mak iha, hodi bele ba funsionáriu permanente, no kontribui serbisu diak iha area saúde ninian. hakotu. (Asesu Notísia Seluk Iha Jornál Timor Post/ Asesu You Tube Timor Post)

 

No More Posts Available.

No more pages to load.