MS Fó Apresiasaun Ba Munisípiu Tolu Tanba Konsege Alkansa Vasinasaun Covid-19 ho Porsentu Aas

by -201 views
Imajen Midia MS

(Reportajen Estaziadu Mariano Abi/Asistente Editor Hermenegildo da Costa Tilman)

Dili (Timor Post) – Ministériu Saúde (MS) fó apresiasaun hodi fahe mós sertifikadu ba Munisípiu Tolu, hanesan Dili, Covalima no Vikeke ne’ebé mak kompleta ona vasina Covid-19 ho porsentu aas.

Ministra MS, Odete Maria Freitas Belo, hatete, apresiasaun, fahe sertifikudu ba  Munisípiu  tolu  ne’ebé mak nia atizinjimentu vasina Covid-19 kompleta ona tuir rekizitu MS nian tanba munisípiu tolu ne’e mak atinje porsentu ne’ebé aas tebes kompara ho munisípiu seluk.

“Apresiasaun ne’e hare tuir klasifikasaun, tuir atinjimentu vasina Munisípiu Dili mak ho porsentu ne’ebé boot liu munisípiu seluk, tuir Munisípiu Covalima no Vikeke,” nia dehan iha ámbitu komemorasaun loron mundiál Saúde, iha Pallasu Sinzas Kaikoli, Kinta (0704).

Iha sorin seluk, Diretora Saúde Munisípiu Dili, Agostinha Seguradu, hatete, apresiasaun ne’e la’ós ba ema ida nia servisu, maibé hamutuk ho estrutura tomak, ba apoiu parseiru sira nian, autoridade lokál, instituisaun relevante, no mós komunidade munisípiu Dili nian.

“To’o ohin loron ba idade 18 to’o 60 ba leten, husi Munisípiu Dili atinje 89,6% ba primeira doze, no ba segundu doze 84,1%, no iha Munisípiu Dili, ekivalente ba númeru husi primeira doze iha tersetu ne’ebé iha hamutuk 213.800 husi númeru ne’e atinje ona besik 191, no ba segundu doze atinje besik 175, ne’e ba ema ho idade 18 to 60,” nia afirma.

“Nune’e, husi apresiasaun ida ne’e sei la to’o ohin, maibé ida ne’e fó tan servisu boot ida, tenke aselera nafatin hodi atinje diak liu-tan porsentu hirak ne’ebe sai hanesan dezafiu ida ba ita,” nia hakotu. (Lee Notísia Iha Jornál Timor Post/ Asesu You Tube Timor Post)

No More Posts Available.

No more pages to load.