MP ho Tribunál Mak iha Kompeténsia fó Sansaun ba Movimentu Ilegál

by -538 views
António Armindo

(Jornalista Jaime Pires / Editór Noémio Falcão)

DILI (Timor Post)—Governu liuhusi Vise Ministru Interiór, António Armindo subliña, kompeténsia atu fó sansaun ba ema ho movimentu ilegál iha liña fronteira maka Ministériu Públiku (MP) ho Tribunál.

Tanba ne’e, António informa, diskuti ona assuntu ne’e ho Primeiru Ministru Taur Matan Ruak no sei husu ba MP ho tribunál toma medida ho rigór.

Hafoin reuniaun ho PM Taur iha rejidénsia Faról, Dili, Tersa (10/08/2021), governante ne’e hatutan, parte rua refere ho baze ba lei sira hala’o ona kna’ar iha leren maka PNTL ho F-FDTL bele iha biban iha baze.

“Tanba ne’e ohin ha’u ho Primeiru Ministru hanesan mós Ministru Interior ko’alia ona katak, se la aplika sansaun ne’ebé mak rigor entaun ema hakat ilegal ne’e sei kontinua,”  António salienta.

Governante ne’e fó rajaun kona-ba governu kontinua estadu emerjénsia no liuliu iha fronteira aplika regra rigór hodi prevene moras daet COVID-19 ho variante Delta ne’ebé sa’e maka’as iha Indonézia no rejista mós ona iha rai laran.

“Ita nia situasaun mak ida ne’e ita kintinua servisu hamutuk nafatin ho ita nia autoridade lokál sira iha fronteira no seguransa sira inklui ita nia parseiru sira hanesan Indonézia atu oinsá haree ita nia fronteira ne’e ho di’ak,” nia afirma.

Nia mós subliña, kona-ba atu tiru tohar sidadaun sira atu tama ilegal ne’e konforme husi nivel ameasa ne’e, se ema liman mamuk labele tiru.

“Se tiru kuandu ita nia membru seguransa sira ne’e nia vida ameasa, hanesan ema tama sai ilegal ne’e lori buat kroat haruka hatun nia la hatun entaun meius ida tenke obriga hodi halo ema ne’e tenke obedese ba regra,” António dehan.

Atu hakotu nia deklara, agora sansaun ne’ebé mak aplika ba sira tama sai ilegal mak haruka selu koima, nia kustu ne’e hahú husi dólar $30 to’o dólar $250 ba kada ema, maibé mós haree ba nia todan. (Lee Notisia seluk iha Jornál Timor Post)

No More Posts Available.

No more pages to load.