Movimentu Haat Fó Parabéns ba Xanana-Ramos

by -409 views
Movimentu Haat hala’o Konferénsia Imprensa hato'o dezeju parabéns ba Xanana ho Jose Ramos Horta, iha Edifísiu Partidu Sosialista Timor (PST), Imajen TP/Cardenio Alves

(Reportajen Estaziadu Cardenio Alves/Asistente Editor Hermenegildo da Costa Tilman)

DILI (Timor Post)— Movimentu  haat hanesan Asosiasaun Kombatente Brigada Negra (ACBN), Sírkulu Revolusionáriu Nasionalista-1 (CRN1), Movimentu Kamponeza Timor-Leste (MOKATIL) no Movimentu Akadémiku Pro-Konstituisaun (MAPK) fó parabéns prezidente Partidu Kongresu Nasionál Rekonstrusaun Timor (CNRT-Sigla Portugés), Xanana Gusmão no Ramos Horta.

“Ami hamriik ho movimentu Haat, hato’o ami nia dezeju parabéns no susesu boot no ba kandidatu prezidente eleitu períodu 2022-2027, Dr. José Manuel Ramos Horta ne’ebé eleitu ho 62,09% votu válidu ba Prezidente Repúblika”, hatete Portavós nu’udar mós prezidente MAPK, Hugo Lourenco da Costa, iha Edifísiu Partidu Sosialista Timor (PST), Sábadu, (23/04).

Movimentu haat ne’e mós hakarak uza momentu ida ne’e, hodi fó apresiasaun ba kandidatu Lu-Olo, no Marí Alkatiri tanba ho fuan boot deklara simu rezultadu eleisaun prezidensiál segunda volta.

“Desizaun ne’e hatudu maturidade polítika nu’udar ema demokrata no lider povu ida ne’e nian, ami mós hein katak postura ne’ebé hatudu ona sei mai fasilita entendimentu ida hodi hamutuk ita foti desizaun ba hatuur hikas iha nia fatin estadu direitu demokrátiku no ita hotu kumpre konstituisaun nu’udar baze ba dezenvolvimentu ita nia nasaun”, nia hatete.

Movimentu ACBN, CRN 1, MOKATIL no MAPK, hakarak hato’o agradese ba povu tomak Timor ne’ebé fó ona votu ba Ramos Horta hodi sai prezidente ba períodu 2022-2027. (Lee Notisia Seluk Iha Jornal Timor Post/Asesu You Tube Timor Post)

No More Posts Available.

No more pages to load.