Mota Laklo Estraga Natar ho Toos Ektare 800

by -750 views
Ministru Jutisa, Manuel Carceres. (Foto TP/Maria Lizia)

(Reportajen Jose Caet/Editor Rosa Garcia)

DILI (Timor Post) – Ministru Justisa, Manuel Caceres, informa daudaun ne’e nia ba vizita iha Manatutu hodi haree ho matan Mota Laklo ne’ebé Estraga Natar ho Toos kuaze 800 resin.

Haktuir Carceres, Primeiru Ministru, Taur Matan Ruak, hakarak rona rezultadu vizita hosi Ministru Justisa iha munisipiu Manatutu no akontesimentu kalamidade ne’e estraga saida de’it, tanba ne’e nia hetan autorizasaun iha dia 15 Abril ba vizita Laklo.

“Ha’u esplika efeitu akontesimentu dia 4 abril katak, mota laklo sobu buat barak no ema nia uma. Ha’u kalkula Natar ho Toos liu 800 Ektare,” informa Caceres hafoin remata audiensia iha rezidensia Primeiru Ministru, Farol, Tersa loro-kraik (27/04).

Governante ne’e hateten, estragu hosi kalamidade ne’ebé presiza atu halo normalizasaun. Tanba Ministeriu Obras Públiku haruka tiha ona Institutu Jestaun Ekipamentu (IJE) atu identifika para depois halo normaliza ba mota ne’e.

Iha audiensia ne’e mós, nia informa ba Primeiru Ministru kona-ba embaixador Koreia sul iha Timor-Leste no Federasaun Taekwondo Timor-Leste sira husu rai atu halo sentru treinamentu.

Maibé, nia hatutan, rai ne’e identifika tiha ona iha suku Tibar, postu administrativu Bazartete, munisipiu Likisa no hein de’it atu halo atribuisaun.

Alende ne’e mós, Primeiru Ministru Taur Matan Ruak husu atu identifika rai ba Vitima inundasaun iha lagoa Tasi-Tolu, mota ninin, tasi ibun no rai-lolon hodi halo realoka ba fatin foun. Hodi livre hosi ameasa inundasaun no dezastre naturais.  Tanba ne’e, Ministeriu Justisa sei orienta sekretariadu terra propriedade hodi identifika rai mamuk .

“En-prinsipiu ita iha rai mamuk balun, estadu nian iha Hera no Tibar para depois hatama iha planu. Sei presiza duni atu halo realokasaun atu evita sira hela iha fatin risku”, afirma .

Nia hatutan, rai estadu iha Hera besik Ektare 26 Tanba ne’e buka tan rai estadu karik iha Tibar hodi prepara. Bainhira Ministeriu Planeamentu no Ordenamentu ho Ministeriu Obras Públiku presiza bele aloka. (Lee notísia seluk iha jornál Timor Post)

No More Posts Available.

No more pages to load.