Moris Di’ak no Kualidade Professor Sai Prioridade ba Armindo Maia 

by -124 views

Timor Post (24/06/2020)- Hafoin simu pasta nu’udar Ministru Edukasaun Juventude no Desportu ba dala rua, Armindo Maia, deklara ba jornalista sira katak, sei  fó prioridade uluk ba reabertura eskola iha timor laran tomak, tau matan ba infraestrutura,  moris di’ak no kualidade profesór.

“Prioridade iha ona primeiru mak reabertura eskola sira hotu ne’ebé ita hotu-hotu hatene tanba afetadu ba covid-19”, Armindo hatán ba pergunta Jornalista hafoin simu pose hosi Prezidente da Repúblika iha Palasiu Prezidente Bairru Pité Kuarta (24/6).

Ministru Edukasaun primeiru Governu ne’e hatutan prioridade tuir fali maka, infraestrutura no fasilidade hanesan meza no kadeira, livru ba profesór no alunu.

 “Depois neineik sei la’o daudauk ita hare mós ba kualidade profesór sira nian no hare ba sira nia bem estar (moris diak) no buat sira ne’e hotu” subliña Ministru.

Armindo foka liu-liu oinsá mak sei fornese bee mós no buat sira kona-ba ijiene ninian ba alunus sira hodi bele reativa fali eskola sira hotu.

“Estadu no governu sei servisu hamutuk ho parseiru sira hotu atu nune’e bele ultrapasa situasaun sira ne’e liuliu ba situasaun ne’ebé mak eskola sira enfrenta durante civid-19” dehan Armindo.

Ministru ne’e promete  sei esforsu apoiu eskola  hotu prenxe kritériu hosi ministériu saúde  hodi bele hahú fali sira nia aprendizajen.(Jornalista: Jaime Pires)

No More Posts Available.

No more pages to load.