Molok Hakotu Iis, Deputadu Guntur Tama Sai Sala ICU no Lakohi Halo Amputasaun

by -82 views
Vise-Ministru Saúde, Bonifacio Maukoli hala’o vizita ba sala Intensive Care Unit (ICU) bainhira Saudozu Deputadu Sabino Soares “Guntur” sei baixa hela.

Timor Post (23/01/2021)- Vise-Ministru Saúde, Bonifacio Maukoli hatete,  Deputadu Sabino Soares Guntur, mate tanba moras diabetes sa’e ona ba estadiu haat (4). Durante hasoru krize boot ne’e, nia konesege tama sai sala Intensive Care Unit (ICU)-Hospital Nacional Guido Valadares (HNGV).

Bonifácio hatete, moras diabetes kuandu tama na ba estadiu haat, ne’e nia komplikasaun ne’e ba aten, rins no mós ba órgaun sira seluk.

“Tanba ida ne’e mak iha loron 05 Janeiru ne’e ami orienta ambulánsia ba iha nia rezidénsia Likisá lori mai kedas ospiál,” Bonifácio hatutan ba Jornalista sira bainhira akompaña matebian nia isin mate iha Mortuáriu HNGV.

Nia dehan, depois to’o iha ospitál, médiku sira halo análiza computerized tomography (CT) scan , depois médiku sira nia suzestau atu halo amputasaun ba ninia kanek ne’ebé mak iha, tanba nia ain kanek no isin balun grave liu ona entaun tenke halo amutasaun hodi bele maran labele fó fali impaktu ba ninia órgaun sira seluk, maibé nia rasik mak lakohi.

“Tanba ida ne’e durante kuaze semana hirak nia laran, ita orienta médiku no espesialista sira halo esforsu hotu, maibé ikus nia drop, entaun foti desizaun hodi halo nia amputasaun ba nia ain (tesi ain sorin karuk),” Bonifácio haktuir.

Depois de halo tiha imputasaun iha loron kuarta liu ba nia komesa rekopera fali, depois nia sai hosi ICU ba fali sala VIP baixa loron hirak nia drop  fila-fali lori fali ba ICU, entaun hosi ne’e mak nia drop kedas to’o nia hakotu iis.

“Nia moras durante ne’e nia rasik mak subar, tanba iha tinan rua-tolu ba kotuk ne’e nia moras tiha ona, tanba ita hatene buat ne’e dala ruma la kuidadu-an estilu de vida ita konsume hahan la kontroladu, entaun ninia moras ne’e aumenta grave,” Bonifácio hatete.

Jornalista Jaime Pires

Editór Noémio Falcão

No More Posts Available.

No more pages to load.