MKAE Garante TL Laiha Problema Kona-ba Foos

by -383 views
Ministru Koordenadór Asuntu Ekonómiku (MKAE), Joaquim Amaral

(Reportajen Jaime Pires/Editor Mateus da cruz)

DILI (Timor Post)-Relasiona ho informasaun iha mídia sosiais dehan katak agora daudaun Timor Leste enfrenta krize foos, Ministru Koordenadór Asuntu Ekonómiku (MKAE), Joaquim Amaral, lamenta ho informasaun ida ne’e no kontinua husu ba sidadaun sira atu lalika fiar ba rumoris tanba stock foos sei iha no foos hosi nasaun sira sei kontinua tama mai Timor Leste.

“Foos ne’e ita hotu hola iha Vietname, maibé ha’u fiar Foos sei mai, maibé agora stock Foos sei iha hela, nune’e mós foos ne’ebé mak ajuda husi Índia mai ne’e mós sei iha,” nia dehan ba jornalista sira iha Parlamentu Nasionál, hafoin partisipa iha debate orsamentu jerál estadu retifikativu, iha Parlamentu Nasionál.

Nia husu ba ema sira atu lalika halo dramatiza iha media sosiál no públiku dehan Foos agora laiha tanba foos hosi nasaun sira kontinua tama mai.

Entretantu relasiona ho governu Indonézia ne’ebé hapara esporta sasán nesesidade báziku liu liu mina ba nasaun sira inklui Timor Leste, Ministru ne’e hatete, nia fiar iha fulan lima ou neen oin mai, Indonézia sei esporta hikas nesesidade bázika mai Timor Leste tanba se lae bele fó mós impaktu ba ninia kooperasaun ho nasaun sira hotu.

“Kona-ba sasán báziku sira Indonézia esporta ona mai ne’e la’ós ba ita de’it maibé ba nasaun sira hotu, maibé ita espera iha fulan lima ka neen nia laran sira sei esporta fali, tanba ida ne’e mós fó impaktu Ne’ebé ha’u garante iha tempu badak folin mina sei normaliza fali lalais, ne’ebé ita labele folin mina ne’e karun durante tempu kleur liu,” subliña Joaquim,” nia deklara.

Daudaun ne’e atu hatán ba problema sasán nesesidade báziku nian iha merkadu ne’ebé menus, governu prepara ona hola produtu lokál sira hodi fahe ba ema hotu-hotu nune’e bele asesu ai-han bázika.

 

No More Posts Available.

No more pages to load.