MJM Deklara Apoiu Isabel Ferreira Kandidatura ba Prezidente Repúblika 2022-2027

by -723 views

Jornalista Cesário Sousa / Editór Noémio Falcão

DILI (Timor Post)—Movimentu Juventude Millenial (MJM) deklara sira nia apoiu ba Isabel da Costa Ferreira kandidatura independente ba Prezidente Repúblika periodu tinan 2022-2027, ho rajaun Timor Leste dadauk presiza Xefe Estadu ne’ebé ukun la ho kultura vingasa.

Isabel da Costa Ferreira nu’udar espoza atuál Primeiru Ministru Taur Matan Ruak.

MJM konsiente Timor Leste ba oin kontinua ho kultura vingativa maka nasaun ne’e la sai husi problema sosial-ekonómiku no laiha dezenvolvimentu nasionál.

“Ho razaun hirak ne’e hotu maka, ami juventude hanoin katak, ema ne’ebé tenke sai Prezidente Repúblika, tenke mai hosi Kandidatura Independente no tenke feto,” deklara Porta-Voz MJM, Aniceto Alberto Carlos liuhusi konferénsia ba imprensa iha Restaurante Benifica, Sábadu (20/08/2021).

Nia hatutan, Isabel da Costa Ferreira hanesan kandidatura ne’ ebé Independente no feto ne’ebé bele asegura unidade nasionál no bele sai guardiã konstituisaun konstituição hodi lori hikas Timor-Leste ba timór-oan tomak.

MJM kompremetidu atu la’o hamutuk ho Isabel hanesan lider joven ne’ebé bele loke odamatan no konkretiza luta juventude sira nian. Nune’e mos la’ós impossivel! Atu mudansa akontese duni iha pensamentu, mentalidade no karáter. Hanesan hateten, Mahatma Gandhi “Seja a mudança que deseja ver no mundo.”

MJM subliÑa, Isabel nu’udar ema ne’ebé nakonu ho personalidade no karáter, ne’ebé maka refleta ba iha valór sira hanesan; karidade, solidariedade; onestidade; tolerante, amante ba paz no entre seluk, valór hirak ne’ ebé timór-oan barak deseja no mehi hodi tau iha prátika, la’ós iha de’it simples diskursu ho karáter retórika.

“Ami hanoin mos, pertinente tebes atu iha istória Timor-Leste nian, liuliu iha momentu krusiál sira hanesan daudaun ne’e, atu sai Prezidente Repúblika ba RDTL tenke ho jéneru feto. Feto ida ne’ebé iha abilidade, kompeténsia, integridade no koñesimentu, e acima de tudo, Timor-Leste presiza Prezidente ida ne’cbé iha sentimentu hanesan inan ida (olhar de mãe),” Aniceto hatutan.

Tempu ona atu eleje feto ba PR, dalan ida oinsá bele promove igualdade jéneru iha Timor-Leste no sira mos husu Isabel da Costa Fereira atu Kompete no Kompleta hanesan kandidatura independente iha festa demokrasia ne’e, tanba ne’e, haree katak laiha balansu bainhira iha eleisaun hotu-hotu númeru barak sei okupadu hosi mane.

“Ami konviktu katak rai doben Timor-Leste, daudaun ne’e nakonu ho kauza oin-oin, só Prezidente Repúblika feto de’it maka bele sai mediadora di’ak, hodi solusiona problema hotu-hotu atu lori hikas esperansa ba oan timor nian tomak,” nia dehan.

MJM mós rekonese katak, eleje kandidatura mai hosi partidu, automatikamente nia sei foti dezisaun barak maka  interese-komum, aktu sira ne’ ebé anti-demokrasia, laiha valorizasaun ba herói no mártires ba libertasaun patria sira ninia luta no tau perigu ba iha Konstituisaun.

To’o notísia ne’e publika Timor Post seidauk hetan konfirmasaun kona-ba Isabel hakarak kandidata-an duni ka la’e ba Prezidente Repúblika periodu ida ne’e.

No More Posts Available.

No more pages to load.