Ministru Salvador: Seidauk Bele Sobu Ponte Bekusi

by -87 views

Timor Post (09/04/2021)—Ministru Obras Públiku (MOP), Salavador Pires hatete, nia simu ona orentasaun husi Primeiru Ministru Taur Matan Ruak atu sobu ponte Bekusi no halo fali konstruksaun foun, maibé seidauk bele realiza tanba sei halo dezeñu no agora sei iha tempu udan.

“Ponte Bekusi iha instrusaun ona ita atu sobu maibé sei halo hela dezenu ida hodi troka ne’e pakote ida, ne’ebé ita sobu konstrui kedas foun, ne’ebé konstrusaun Ponte Bekusi ne’e tama mós ekipa emerjensia,” Ministru Salvadór bá Jornalista sira iha Palásiu Governu, Kinta (08/04) kalan, hafoin reuniaun Konsellu Ministru.

Governante ne’e klarifika, deklarasaun primeiru ministru katak “aban” sobu kedas ponte ne’e signifika iha futuru imidiata.

“Primeiru Ministru konkorda katak, liafuan ida aban sobu signifika futuru imidianta no kondisaun ho nia solusaun hodi dezenu ida troka fali,” Salvadór hatete.

Tanba ne’e, nia hatutan, agora entre ADN ho Obras Públiku mak sei prepara hela, hodi aprezenta tanba kalkulasaun husi ezersisiu to’o taskforce bazeia ba despaixu husi Primeiru Ministru nian.

Antes ne’e Primeiru MInistru Taur Matan Ruak ko’alia ho hirus katak tenke sobu kedas ponte Bekusi tanba kontruksaun ponte ne’e nia okos modelu kuartu ne’ebé  bianhira mota boot lori foer ba kait no bee hala’o la tuir dalan fó impaktu tebes ba komunidade sira iha area ne’eba.

Iha tinan hirak liu ba ema na’in-ida mate tanba derepente mota tún maka’as la tuir dalan no nakonu sai ba sobu komunidade sira nia uma iha ponte ninin.

Ministru Salvador dehan, oras ne’e daudaun nia fó ona orentasaun ba (IJE) no mós setor privadu sira ho sira nia ekipamentu pejadu hodi kontinua hasai foer sira iha mota laran ne’ebé afeta ba inundasaun.

Ministru Salvadór seidauk fó sai dadus kona-ba dezastre natural estraga ponte no estrada hira tanba ekipa sei rekolla hela.

Enkuantu tuir dadus husi Sekretáriu Estadu Protesaun Sivil (SEPS), Joaquim Gusmão katak, ema lakon vida iha inundasaun ne’ebé akontese iha loron 4 fulan Abríl ne’e, hamutuk 42, Munisípiu Dili 22, Ainaro 10, Manatutu 5, Vikeke na’in-3 no na’in-2 husi Aileu.

Jornalista Jaime Pires

Editór Noémio Falcão

No More Posts Available.

No more pages to load.