Ministru Edukasaun Rekoñese Problema Boot

by -31 views
Armindo Maia

DILI—MInistru Edukasaun Juventude no Desportu (MEJD), Armindo Maia, hatete atu reativa eskola iha munisípiu Dili problema boot tanba númeru Covid-19 aumenta maka’as.

“Dili problema boot, Dili ne’e ministériu labele foti desizaun mesak. Ne’e ami tenke saida ho ministériu saúde sentru integradu, sei ba to’o konsellu ministru,” ministru edukasaun juventude no desportu, Armindo Maia hatan pergunta jornalista kona-ba estudante no profesór iha Dili husu reativa eskola iha UNTL sentral, Kolmera Dili, Segunda-feira (14/06).

Governante ne’e konsidera atu foti desizaun hodi reativa eskola iha munisípiu ninia konsikoensia todan tebe-tebes.

“Ne’e nia konsikoensia todan tebe-tebes, ita hatene katak Dili mak sai sentru, ami presiza sekraik hotu-hotu saida. Ita hotu-hotu tenke assume responsabilidade,” nia hatutan.

Tuir ministru Armindo katak, MEJD atu loke eskola iha Dili fasil tanba oras ida de’it bele hasai despaisu maibé tenke tetu ninia konsikoensia.

“Ministériu atu loke ne’e fasil. Ha’u hatun despaisu ida pronto oras ida hanesan ne’e despaisu sai it abele la’o ona. Mais iha konsikoensia ne’e mak ita tenke tetu ita preparadu ka lae. Hotu-hotu tenke assume responsabilidade entaun ita bele,” nia ehan

Entretanta, daudauk ne’e munisípiu sira ne’ebé mak laiha serka sanitáriu no konfinamentu obrigatóriu hala’o prosesu aprendizajen hanesan baibain no ba munisípiu sira ne’ebé mak serka sanitáriu no konfinamentu obrigatóriu suspende.

“Iha munisípiu Lima maka neste momentu suspensaun hanesan Dili, Kovalima, Bobonaru Baukau no Viqueque, ba munisípiu seluk kontinua aprendizajen hanesan baibain,” nia informa.

Dala ruma ministériu haree eskola ida, rua afetadu entaun ministériu edukasaun juventude no desportu sei fó kompetensia ba autoridade lokal atu foti desizaun.

Entretantu, estudante no profesór iha munisípiu Dili ezije ba ministériu edukasaun juventude no desportu atu reativa ona atividade letiva prezensial.

“Ha’u sente triste tanba iha serka sanitáriu ne’e ami la tuir aprendizajen hahú iha tinan 2020 la’o to’o agora paradu, ami hanesan estudante sente lakon boot,” Estudante Zeremias Mendonça Fernandez, hatuun lian tristeza ne’e ba Timor Post iha Bekora Dili, Sábadu (13/06).

Nia hatutan, tinan ida ne’e estudante iha Dili la tuir ezame primeiru periodu no segundu periodu no preparasaun ba ezame nasionál tanba laiha prosesu aprendizajen.

“Ita haree ai la tuir ezame primeiru periodu no segundu periodu, eskola seluk online maibé ami laiha tanba dfifikuldade tebes ba ami hanesan ema baibain nia oan laiha forsa atu hola pulsa,” nia hatete.

Enkuantu, estudante ne’e ladún fiar ba rezumu ne’ebé mak profesór sira fahe tanba la hetan esplikasaun, nia parte sente defisil ba preparasaun ezame nasionál.

“Ami simu rezumu maibé atu prepara ba ezame ne’e ladún, ita tuir aprendizajen mak di’ak para ita bele, rezumu de’it ha’u sente defisil loos tanba la hetan esplika tan,” nia kestiona.

Entretantu, diretór eskola ESJ 5 de Maiu, Mauel Verdial hatete, ezame nasionál besik daudauk ona oinsá atu prepara estudante finalist sira hodi hasoru ezame nasionál tinan ida ne’e tanba fulan ha’at ona atividade eskola suspende.

“Tinan ida ne’e labarik sira sei hetan resultadu ezame nasionál tuir situasaun nian, maibé oinsá atu husu sira para prepara didi’ak tanba ita hare munisípiu balun agora prosesu aprendizajen la’o hela,” nia preokupa.

Dirijente eskola ne’e konsidere tinan ida ne’e prosesu aprendizajen mamuk ba estudante sira tanba tanba ezame primeiru periodu mós  la’o ho ezame formativa.

“Labarik sira tenke mai fila fali ona eskola, hodi rona mestre sira esplika atu nune’e jestaun pedagojia metodolojia ensinu labarik sir abele sente sentidu kualidade ensinu ida,” nia hatete. (ono)