Ministru Defeza: Transferénsia Orsamentu Tarde La’ós Afeta de’it ba F-FDTL

by -574 views

Timor Post (17/02/2021)—Ministru Defeza, Filomeno da Paixão de Jesus, subliña, kestaun transferénsia orsamentu ne’ebé tarde la’ós afeta de’it ba F-FDTL maibé mós ba institusoins estadu nian barak.

Ministru Filomeno subliña kestaun ne’e hafoin reuniaun semanal ho Prezidente Repúblika Francisco Guterres Lú Olo, Tersa (16/02/2021), iha Palásiu Prezidensiál Bairro-Pite, Dili.

Ministru rekoñese preokupasaun Xefe Estadu Maior F-FDTL, Maijor Jeneral Lere Anan Timur kona-ba osan ransu ba forsa sira tarde, maibé nia informa, rezolvidu ona.

“Osan ba F-FDTL rezolvidu ona,” Ministru Defeza haktuir iha komunikadu ne’ebé Timor Post asesu iha pájina offisiál Facebook Ministériu nian.

Xefe Estadu Maijor Jenerál Lere, semana kotuk, preokupa tebes ho atrazu transferénsia osan ba F-FDTL ne’ebé fó impaktu ba falta apoiu lojístiku ba operasaun Forsas Armadas ninian, liuliu relasiona ho implementasaun Estadu Emerjénsia, ate forsa sira iha fronteira hahú deve sasan iha kiosk sira hodi sustenta nesesidade.

Entretantu, iha komunikadu ne’e haktuir mós katak, Ministériu Defeza hein hela proposta husi Xefe Estadu Maior Jenerál relasiona ho rekrutamentu ba membru foun F-FDTL nian hodi aprezenta ba Konsellu Ministru. Ministru Defeza sei hein proposta husi Xefe Estadu Maior Jenerál kona-ba rekrutamentu ba 600 membru foun sei halo dala ida de’it ka hala’o uluk ba 300.

Tuir husi Ministériu Defeza sei rekruta membru F-FDTL foun hamutuk 1200 maibé tanba kestaun orsamentu aprova uluk mak 600. Aleinde kestaun orsamentu, kondisaun iha Sentru Formasaun F-FDTL bele akomoda rekrutamentu masimu na’in-600 de’it tanba lojistikamente la prontu atu halo rekrutamentu 1200 dala ida de’it.

Iha 12 janeiru 2021, Prezidente Repúblika promulga Dekretu-Lei kona-ba Regulamentu Lei Servisu Militár ne’ebé Konsellu Ministru aprova iha outubru 2020.

Regulamentu Lei Servisu Militár ho objetivu fundamental ba valorizasaun sívika, profisionál, kulturál no fíziku husi sidadaun. Tuir Programa VIII Governu hatur area defeza nu’udar objetivu prinsipál sira atu insentiva servisu militár, nu’udar dever patriótiku, promosaun ba reflesaun kona-ba serbisu militár obrigatóriu no haburas entre profisionais iha setór atu sai modelu ezemplar ba sidadaun no integridade.

Revizaun ba Regulamentu Lei Servisu Militár hala’o hafoin Estatutu Militares F-FDTL foun, liuhusi Dekretu-Lei númeru 33/2020, 2 setembru, tama iha vigor ne’ebé konsagra servisu efetivu normal ho karáter obrigatóriu ba sidadaun hotu-hotu, feto no mane, husi idade 18-30 ho durasaun fulan-18.

Dekretu Lei ne’e hateten katak rekrutamentu ba sidadaun sira atu tuir servisu miitár obrigatóriu sei hala’o tuir modalidade normal, espesiál no exesionál.  (*/cao)

No More Posts Available.

No more pages to load.