Ministru Agostinho Deskonfia Ema Balun Privatiza Ró Berlin Ramelau

by -820 views
Foto Espesial

Jornalista Jaime Pires / Editór Noémio Falcão

Dili (Timor Post)—“Hanensan ministru ha’u lakohi ró foun ida ne’e sai fali objetu bisnis ba ema balun,” Ministru Transporte no Komunikasaun (MTK), José Agostinho informa ba Jornalista sira hafoin informa operasaun ró Berlin Ramelau ba Primeiru Ministru Taur Matan Ruak, iha Rezidénsia Primeiru Ministru, Farol-Dili, Tersa (04/01/2021).

Ministru Agostinho hatete, lakohi temi temi ema ne’e nia naran, maibé tau atensaun másimu ba operasaun ró ne’e hodi fasilita movimentasaun transporte ba populasaun sira no fó lukru ba estadu.

“Ha’u pro-ativu kontrola to’o kalan mós ha’u monitor ró ne’e ninia paradeiru iha ne’ebé, oinsá atendimentu ba ita nia kru sira iha ró ne’e,” nia hatutan.

“Ha’u hanoin públiku durante ne’e haree ha’u kontrola kuandu ita nia ró operasaun dala hira. Iha indísiu balun maibé ha’u lakohi temi ema ne’e nia naran, maibé iha indisiu balun,”  governante ne’e hatete.

Nia informa ona ba primeiru ministru kona-ba kondisaun no operasaun ró Berlin Ramelau.

“Ohin ha’u hato’o ba Primeiru Ministru kona-ba ita nia Ró Ahi Berlin Ramelau nia kondisaun ne’ebé mak holo ona operasian ba dala haat ona husi Dili ba Oe-Kusi,” Ministru Agostinho dehan.

Ministru ne’e mós subliña, Ró Berlin Ramelau nia kapasidade tula pasajeirus na’in-380, maibé durante ne’e tula to’o tiha na’in-400.

Governante ne’e mós hatete, iha mós difikuldade ne’ebé mak infrenta liu-liu liga ba funsionamentu normál ba atendimentu Konsellu Administrasun APORTIL ba Ró ahi ne’e rasik oinsá mak fornese konbustivel, bee moos, no oinsá mak halo atendimentu lojístika ba tripulantes sira hodi asegura movimentu ne’e.

Entretantu tuir informasaun ne’ebé Timor Post rekolla haktuir, pasajeiru sira hola tiket ho folin $8 inkuantu antes ne’e Primeiru Ministru Taur Matan Ruak deklara folin tiket $4.

Primeiru Ministru Taur Matan Ruak, ofisialmente inaugura Ró Berlin Ramelau iha Portu Dili, Segunda (20/12/2021) no hetan bensaun husi Arsebispu Metropolitanu Dili Don Virgílio do Carmo da Silva.

Taur konsidera Ro Berlin Ramelau nu’udar prezente boot ida ba populasaun sira iha Timor-Leste liuliu Oekusi no Ataúro.

Ró ne’e konstruí hosi kompañia Damen Shipyards Gorinchem iha estaleiro Yichang, Xina, hosi fundu kontra partida entre Governu Timor-Leste no Alemaña iha tinan 2019.

No More Posts Available.

No more pages to load.