Ministériu Turizmu Sei Kapasita Joven Ne’ebé Dezenvolve Turizmu Iha Komunidade

by -258 views

Timor Post (07/07/2020)- Vise Ministra Turizmu Komérsiu no Komunitáriu, Inácia da Conceição Teixeira hatete, planu governu iha rekuperasaun ekonomia, maka alende identifika fatin turístika, sei fó mós formasaun ba joven kreativu sira ne’ebé dezenvolve turizmu iha komunidade sira leet.

Asuntu ne’e Vice Ministra fó sai hafoin simu orientasaun hosi Primeiru Ministru Taur Mata Ruak, iha Palasiu Governu tersa (07/07).

“Planu ba rekuperasaun ekonomia relasiona ho kovid-19 ba area turizmu ninian, agora ita labele halo viajen ba rai li’ur, maibé ita tenta halo nusa atu dezenvolve turizmu doméstiku ninian. Agora ita tenke halo planu lai ba fatin sira ne’ebé mak eziste, no joven barak iha talentu entaun fatin ne’ebé mak sira iha tiha ona ita servisu hamutuk, koopera atu fó treinamentu ba sira, oinsá ba jestaun no atu jere sira nia fatin ne’e, ba nivel ekonomia nian halo nusa, ida ne’e mak ami tenta planu programa atu responde ba sira ne’e”, hatete Teixeira”, informa Inácia Teixeira ba jornalista sira hafoin hasoru malu ho Primeiru Ministru iha Palasiu Governu, tersa (07/07).

Tuir Governante feto foin sa’e ne’e katak ho fó formasaun ba joven kriativu sira bele dezenvolve liu tan turizmu komunitaria tanba, turizmu ne’e ho setór privadu, entaun governu liu hosi turizmu nia papél ne’e atu kria mekanizmu halo nusa atu kontrolu no planu negósiu nian halo nusa, atu fó hanorin ba juventude sira hodi sira bele jere fatin ne’e rasik.

(Jornalista: Jaime Pires)

No More Posts Available.

No more pages to load.