Militár Foun Na’in-598 Preparadu ba Graduasaun

by -4.052 views
Foto TP: Jaime Pires

Jornalista Jaime Pires / Editór Noémio Falcão

Dili (Timor Post)—Militar foun na’in-598 inklui mane na’in-539 no feto na’in-59 preparadu ba graduasaun iha fulan Fevereiru 2022. Sira kompleta ona formasaun durante fulan hirak nia laran.

Xefe Estadu Maior Jenerál FALINTIL-Forsa Defeza Timor Leste (F-FDTL), Tenente Jenerál Lere Anan Timur apresia ho foinsa’e sira ho vontade boot kumpri regra hotu hodi involve iha instituisaun defeza ba nasaun nian.

Ba Jornalista sira iha Komponente Formasaun no Treinu, Metinaru, Dili, Kuarta (15/12/2021), Lere subliña, iha serimónia graduasaun sei iha juramentu ne’ebé todan ho komprimisu nu’udar liman kroat ba povu no nasaun.

“Katak serví povu no nasaun mak nesáriu bele fó-an ba mate, no ba família nesesáriu bele fó-an ba mate, laiha tan buat seluk,” Lere hatutan.

Iha serimonia Formatura ne’e, mós Lere husu ba Membru Militár sira foun foti liman ba sira ne’ebé mak tuir Arte Marsial sira hanesan, KORK, PSHT, IKS, 77 no Kolimau-2000.

Hafoin haruka foti liman, observasaun ne’ebé mak Timor Post hare membru foun sira ne’ebé mak tuir Arte Marsial sira foti liman kuaze na’in-100 resin mak tuir Arte Marsiail hanesan,  KORK, PSHT, IKS, 77 no Kolimau-2000.

“Iha fulan Fevereiru mai, sira simu graduasaun, sira ne’ebé mak tuir Arte Marsial ne’e sei lori hotu sira nia atributu arte marsial nia hodi entrega, molok halo juramentu no simu graduasaun,” dehan Lere.

Lere dehan, tama ona F-FDTL, sei halo Misaun rua de’it mak ohin, servi povu no nasaun ida tan mak servi família, la bá servi tan arte marsial sira no buat seluk tan.

No More Posts Available.

No more pages to load.