Militar Foun Halai Sai husi Kuartel Subar iha Ferikoan nia Uma, Kapturadu

by -6.184 views
Imajen ne'e hatudu formatura militar foun. Foto Espesial

Jornalista Jaime Pires / Editór Noémio Falcão

DILI (Timor Post)—Militar foun ho inisiál AFR ne’ebé halai sai husi kuartel iha loron Kuarta madrugada (20/10/2021) ba subar iha nia ferikoan nia uma iha Kuluhun-Dili. Maske nune’e, Polísia Militár konsege haptura hodi ba halo investigasaun.

Tuir kronolojia, AFR nu’udar aman ba oan na’in rua ne’e halai sai husi kuartel tuku tolu madrugada no tuku haat ba kedas iha nia feton nia uma iha Kamea-Bekora no kontinua ba subar iha ferikoan nia uma iha Kulu-Hun.

Dader tuku sia ho balu, derepente intelijénsia husi militár (J2) na’in-tolu mosu iha Bekora hodi buka militar foun ne’ebé husi munisípiu Manufahi ne’e.

Intelijénsia sira to’o iha nia uma iha Bekussi Sentu mos la hetan. Maibé rona informasaun katak nia subar iha ferikoan nia uma maka intelijénsia haruka nia alin mane ba tula hodi entrega-an.

Maibé, bainhira too iha Bekussi, AFR haree hetan Polísia Militár sira, nia halai no membru sira duni konsege kaptura iha bairro Amular.

Hafoin kaer lori mai nia uma hodi husu, militár foun ne’e hatete, nia parte hakarak halai sai tanba sente moras todan halo nia kalan la toba.

“Ha’u la’ós lakohi sai militár, ha’u hakarak sai forsa maibé ha’u sente kalan-kalan ha’u toba ladi’ak, tanba sente ema Buti hela de’it ha’u nia kakorok,” AFR haktuir.

Nune’e, intelijénsia J2 na’in-tolu hamutuk ho membru Polísia Militár na’in-ida kontinua lori AFR ba Kuartel Polísia Militár, Kontal Boot, Dili, maizumenus tuku sanulu liu.

No More Posts Available.

No more pages to load.