Milena Pires Kritika Horta Utiliza Sigla ho Figura Xanana

by -524 views
Kandidatu Prezidente Republika Periodu 2022-2027, Maria Helena Lopes de Jesus Pires, Foto TP/Maria Lizia

(Reportajen Cardenio Alves/Editor Mateus da Cruz)

DILI(TimorPost)- Kandidatu Prezidente Repúblika, Milena Pires, iha Edifisiu CNE, Kaikoli, sesta ne’e, hato’o nia preokupasaun ba CNE kona-ba kandidatu ho númeru sorteiu 14, Ramos Horta, ne’ebé utiliza sigla ho figura Xanana Gusmão ne’ebé nu’udar fundadór nasaun ba iha bulletin de votu.

“Ha’u Hakarak husu, kuandu fundadór nasaun hanesan Xanana Gusmão konsidera nu’udar patrimóniu estadu ka lae, tanba povu hotu hatene istória Xanana Gusmão no sai indivíduu ba kontribuisaun tomak, ne’ebé halo ba nasaun Timor Leste,”nia preokupa.

“Bele ka Lae, nu’udar fundadór estadu ne’ebé husi parte ha’u nian konsidera nu’udar patrimóniu estadu, tanba importánsia ba grupu Ida no seluk, maibé parte ida ne’e fiar katak importánsia ba Timor oan tomak,

Ha’u ko’alia ba Ha’u Nia fiar kuandu Ita laiha Xanana Gusmão Nia kontribuisaun ohin loron Ita laiha ne’e,” hatutan.

Reprezentante Partidu Fretilín, Jose Nakfilak, hatete, kandidatu balun ne’ebé eskolla figura nasionál ida tau hamutuk iha postura kandidatu nian ne’e konsidera la eduka povu.

“tuir Fretilín nia observasaun katak ida ne’e la eduka povu,” nia hatete.

Nia dehan, prosesu eleisaun ne’e atu lori povu haree kandidatu ne’e loloos ne’e see, se ida mak hakarak sai prezidente repúblika, nia mak tenke iha postura ne’e atu nune’e demokrasia ne’e bele la’o ho transparente.

“Labele aproveita prosesu Sira ne’e hodi habeik fali ita Nia povu, Ida nee Mak Fretilín nia preokupasaun ba CNE hodi haree didi’ak,” Nia husu.

Iha Fatin hanesan, reprezentante hosi kandidatu PR, Rogerio Lobato hatete, kandidatu Ramos Horta eskola sigla ho figura nasionál Xanana ne’e tanba kandidatu Horta rasik seidauk fiar aan.

“Ita ko’alia patrimóniu estadu, Xanana ne’e patrimóniu estadu, maske, kandidatu  Jose Ramos Horta, nu’udar figura nasionál no mundial maibé hanesan jerasaun foun dehan katak, Ramos Horta la fiar a’an, tanba nee mak sei tau Xanana nia figura ka imajen iha bulletin votu ninian, atu bele hetan fiar husi povu,” nia dehan.

Hatán ba preokupasaun sira ne’e, Prezidente Comisaun Nasional Eleisaun (CNE), Jose Belo, hatete, sigla ou símbolu ba bulletin votu ne’e nia funsaun atu eleitór sira labele konfunde no atu bele vota ho sentimentu rasionalidade.

Nia hatete, lei fó dalan atu livre eskolla, tanba ne’e bainhira kandidatu husi partidu Ida no independente preokupa, bele halo rekursu ba Tribunal.

“Ita la’o artigu ne’ebé livre eskollidu, nune’e komisáriu sira di’ak liu ita aprova ona ba proposta ne’ebe iha, importante liu mak kandidatu Sira konkorda, Tanba CNE iha apoiu atu muda buat ruma ne’ebé falla iha Bulletin votu antes ba votante sira”, nia dehan.

Tuir observasaun maski iha kritika no preokupasaun hosi kandidatu sira no reprezentante kandidatu sira balun maibé ikus kandidatu sira hotu konkorda no aprova  bulletin de votu hodi bele hahú halo impresaun.(Lee notisia seluk iha jornal Timor Post/asesu youtube Timor Post)

No More Posts Available.

No more pages to load.