Milena Otimista Prezidente Repúblika Sei Lidera Hosi Feto

by -929 views
Kandidata númeru sorteiu 7, Milena Pires, ezerse votu, iha Sentru Votasaun EP, 05 Kampu Baru, Imajen TP/olga soares

(Reportajen Olga Soares/Edito Marcos Fernandes)

DILI( Timor Post)- Hafoin ezerse votu, iha Sentru Votasaun EP, 05 Kampu Baru, Kandidata númeru sorteiu 7, Milena Pires, ho fuan boot otimista katak, kandidatu Prezidente Repúblika períodu 2022-2027, sei lidera hosi feto ida.

“Ha’u sente kontente tebes,  tanba ida ne’e la’ós  vota ba ha’u nia kandidatura, maibé vota ba feto Timor-Leste tomak no mós vota ba joven TL tomak, nu’udar kandidatura iha otimista ida, katak Prezidente Repúblika períodu 2022 to’o 2027, sei lidera hosi feto”, deklara Milena hafoin ezerse votu iha Sentru votasaun EP 05 Kampu Baru Komoro, Sábadu (19/03).

Nia dehan, hanesan kandidata sempre iha esperansa, tanba ho programa ne’ebé hato’o monu ba ema hotu nia laran, importante ba grupu feto no mane sente katak kandidata sei hetan votu.

“Nu’udar kandidatu sempre tama iha kurida  atu manan, hanesan kandidata feto mós iha otimista katak tinan ida ne’e ba oin, durante tinan lima nia laran ne’e feto Timor -Leste sei lidera ita nia nasaun no ba povu nia moris di’ak”,  Nia esperansa.

Nia rasik prontu atu simu rezultadu saida de’it tanba iha eleisaun ne’e povu maka deside.

“Ha’u prontu simu rezultadu manan ka lakon tenke simu”, Milena  hatán ho hamnasa.

Tuir observasaun Timor Post, iha Sentru votasaun EP, 05 Kampun Baru Komoro nota katak, partisipasaun eleitór másimu hodi ezerse sira nia diretu, iha oportunidade ne’e, brigada sira fó oportunidade ba inan ho bebé, inan gravida no ferik katuas sira.

No More Posts Available.

No more pages to load.