Migrasaun Kaptura Sineza Feto ida iha Otél Hudi Laran

husi -49 views

Timor Post (09/10/2020- Servisu Migrasaun liu husi ekipa operasaun, Sesta (09/10), iha tuku 5 lokraik kaptura sineza feto ida ho inisial WY (45) iha Hotél Hudi Laran, Dili.

Mandadu kapturasaun ne’e bazea ba despaixu husi Tribunál hatun ba iha Diretór Jerál Migrasaun hafoin hatun hikas ordem ba iha Komandante operasaun hodi halo kapturasaun.

“Ita kaptura sidadaun ne’e bazea ba desizaun husi Teibunál Distritál Dili, tanba sidadaun ne’e komete krime fraude fiskal ne’ebé sita iha artigu 314 kodigu penal,” Inspetor Polísia atual Komandante Migrasaun Operasaun, Luis do Carmo ba Timor Post iha sede Migrasaun Vila-verde Dili.

Sidadaun ne’e komete krime ba dahuluk la selu taxa ba SERVE, la selu mós impostu la selu trabalador, impostu rendimentu no impostu retensaun final inklui la selu uma aluga.

Enkuantu sidadaun ne’e loke kompania ho naran Thaswada D Lda iha Timor Leste, tanba ne’e sidadaun ne’e lakumpri obrigasaun hodi selu impostu komesa husi tinan 2017 Junu too 2018 ho valor osan rihun haat atus rua hitu nolu resin lima.

Ligadu ho krime ne’ebé iha arguida rasik lakohi deklara rendimentu ikus hodi hadok nia an husi tipu taxa hirak ne’e .

“Arguida ita asegura nia iha sede Migrasaun no ita sei la detein nia iha sela no ita sei kontaktu ba nia advogadu mai hafoin konfirma nia ba iha Embaixada China iha Timor Leste hodi selu koima ne’ebé iha hafoin Servisu Migrasaun entrega ba embaixada Cina iha TL hodi halo prosesu,” Komandante operasaun haktuir.

Komandante Operasaun ne’e afirma katak, ba oin ekipa konjunta operasaun Migrasaun sei halo operasaun tama sai hodi indentifika ema ne’ebé uza vistu turista ba vistu traballu hodi halo prosesu.

Tuir observasaun Timor Post iha sede Migrasaun Vila-verde nota katak, sidadaun sineza ne’e ekipa operasaun Migrasaun la detein maibé sidadaun ne’e toba de’it iha servisu fatin operasaun nian.(res)