Mídia Tenke Servisu Ho Neutralidade La’ós Oportunidade

by -345 views
Diretór Asosiasaun HAK, Sisto dos Santos

(Reportajen Cardenio Alves/Editor Mateus da Cruz)

DILI (Timor Post)—Asosiasaun HAK husu ba mídia sira hotu tantu imprime, elektroniku no Online atu hatudu neutralidade iha publikasaun informasaun ba públiku liu-liu durante eleisaun segunda volta.

“Ami husu  ba mídia hotu-hotu tenke servisu ho justu no onestu ba kode étika ne’ebé vigor”. hatete Diretór Asosiasaun HAK, Sisto dos Santos, iha nia kna’ar fatin Farol.

Nia hatete, mídia tenke hatene nia kna’ar no servisu hodi hasai informasaun ho neutralidade ba públiku la’ós oportunidade ba aan rasik, liu-liu mídia polítika sira ne’ebe la honestu uza informasaun rohan de’it, sai propaganda polítika ba públiku hodi preokupa.

Tuir nia, mídia nasionál, rejionál, to’o lokál labele sai oportunista, maibé tenke neutralista. No Partidu polítika sira labele uza midia atu aproveita momentu ida ne’e hodi hetan di’ak no benefísiu ba aan, maibé husik povu nafatin moris iha risku nia laran,

“tanba mídia bainhira tuir polítika sira nia hakarak, signifika la neutru, automátika la hanoin  no ezerse ba povu hotu-hotu nia direitu iha nasaun ida, no hatene de’it mak liberta ba aan maib’e lahatene serve povu no abandona povu moris iha kondisaun mizeravel nia laran”, nia husu.

Tuir nia, mídia labele haree ba partidu fanátiku, maibé mós tenke hasai informasaun ho honestu, polítika saida mak partidu sira ne’e apela ba povu no nasaun atu públiku bele komprende situasaun nasaun nian.

”kandidatu ida ne’ebé mak ita hili nia ba sai prezidente nee ita nia aman ba nasaun no povu  hotu-hotu liu-liu Timor-Leste ida ne’e, maibé nu’udar mídia ida mak haree de’it mak partidu ida nee laiha ona pozisaun independente no neutralidade, maibé ne’e hatudu momós katak oportunidade ba aan rasik”, dehan tan.

Nune’e nia husu ba jornalista sira atu labele hamonu dignidade jornalista nu’udar traballadór neutru iha nasaun ida, tanba povu nia ezijénsia liu husi mídia nune’e tenke komprende no entende. (Lee Notisia Seluk Iha Jornal Timor Post/ Asesu You Tube Timor Post)

No More Posts Available.

No more pages to load.