MI Sosa Uma ba Servisu Imigrasaun

by -302 views
Vise-Ministru Interior (V-MI), António Armindo

(Reportajen Jaime Pires/Editor Mateus da Cruz)

DILI (Timor Post)- Ministériu Interior (MI), sei sosa uma ho montante millaun 3 USD hodi sai edifísiu permanente ba Servisu Imigrasaun Timor-Leste.

“Ohin hasoru malu ho Primeiru Ministru hanesan mós ho Ministru Interior, hodi ko’alia kona-ba uma foun ida ne’ebé mak ita haree ona atu sosa hodi sai edifísiu ba Imigrasaun,” dehan Vise-Ministru Interior, António Armindo ba jornalista sira iha, Faról, Segunda (25/04).

Nia hatete, uma ne’ebé ministériu Interior atu sosa ne’e lokaliza kedas ministériu interior nia oin no  ministériu deside atu sosa tanba durante ne’e servisu imigrasaun laiha edifísiu rasik hodi hala’o servisu.

“Uma ne’e hamriik hela iha ne’ebá, ida ne’e mak governu planu hela atu sosa hodi fó ba ita nia Servisu Imigrasaun, tanba sira edifísiu laiha to’o agora hamutuk de’it ho ministériu interior, ne’ebé governu tau ona osan kuaze millaun trés no agora iha diskusaun hela ba tiha ona obra públika depois aprova ita bele ba kontratu ho na’in ona,” nia hatete.

Tuir nia, uma ida agora atu sosa fó ba Imigrasaun ne’e governu tenke sosa tanba uma ne’e uma privadu la’ós estadu nian.

“Uma ne’e uma privadu maibé iha laran kompletu ona duke ita ba buka tan rai no halo atribuisaun ba rai depois halo konstrusaun, agora ida ne’ebé estandarte konstrusaun di’ak ona di’ak liu ita hare hodi uza daudaun ona, se lae ita hein to’o tinan 10 ka 20 mai mós ita nunka iha edifísiu ida ba Imigrasaun,” nia dehan.

Nia espera katak prosesu ne’e bele realiza lalais atu nune’e funsionáriu sira liu-liu parte imigrasaun nian bele servisu ho di’ak liu.(Lee Notísia Seluk Iha Jornál Timor Post/Asesu You Tube Timor Post)

No More Posts Available.

No more pages to load.