MI Prevee 15 Milloes Ba Orsamentu Adisional 2021

by -189 views

Timor Post (21/09/2020)- Vise-Ministru Interior Antonio Armindo hatete, ministériu hamutuk ho sekretáriu estadu protesaun sivíl no Polisia Nasionál Timor-Leste prevee osan adisional ba tinan 2021 kuaze $17 milloes.

Governante argumenta proposta adisional ne’e presiza duni tanba la konsege hatán iha pakote ne’ebé mak ministériu finansas fó. Maiske nune’e depende ba desizaun hosi komite revizaun orsamentu.

“Osan adisionál ba Interior no protesaun sivíl inklui ho servisu imigrasaun iha $7 milloes ital ba PNTL ninia $8 milloes entaun tau hamutuk $15 milloes itál, maibé parte ida ne’ebé mak komisaun revizaun ba orsamentu atu ko’a”, informa Antonio Armindo jornalista sira iha Palsiu Governu, segunda (21/09).

Armindo fiar ekipa komisaun no tékniku orsamentu ne’e sei bolu nia tékniku sira atu hare hamutuk ida ne’ebé mak importante kontinua tau iha orsamentu 2021 no ida ne’ebé mak presiza hasai, hare fali ba tinan seluk.

Akresenta governante ne’e katak, adisional ne’e ligadu ho konstrusaun postu ba PNTL, UPF hamutuk (6) iha area fronteira hanesan, Motain, Tunu Bibi, Salele, Sakoto, Oesilo no computer no printer ba postu sira, hodi hatán ho programa servisu liu online kontrola ema tama sai, ba protesaun sivíl area Bombeirus atu ajuda komunidade iha dezastre naturais tanba agora besik tempu udan.(Jornalista: Jaime Pires)

No More Posts Available.

No more pages to load.