Meza no Kadeira Foun ba PPN-VPN Folin Dolar Rihun 4 Resin

by -106 views

Timor Post (17/08/2020)—Kompañia Jepara Meubel, segunda (17/08), maizumenus oras tuku 10 resin, entrega ona meza foun Prezidente Parlamentu Nasionál (PPN) no meza Vise Prezidente nain rua nian ba Parlamentu Nasionál.

Karpinteiru Domingos Soares, hatete, durasaun tempu hodi halo meza tolu kuaze fulan ida, no meza sira ne’e halo husi ai-teka, ne’ebé mak ho kualidade di’ak.

“Ami halo meza ne’e prosesu fulan ida, hahú husi Jullu to Agostu remata, meza ne’e ami uza ai-teka. Meza Prezidente Parlamentu nian ne’e naruk metru rua sanulu, nia luan ne’e metru ida. No vise nain rua nia metru rua,” Domingos hato’o ba jornalista sira iha PN.

Domingos admite, nia parte la hatene kona-ba kustu husi meza tolu ne’e, tanba na’in ba kompañia ho parlamentu mak halo kontratu.

“Orsamentu ha’u la hatene, tanba sira mak hatene malu, ha’u labele fó sai.” Domingos afirma.

Iha fatin hanesan, Sekretaria Jerál PN, Cedeliza Faria, hatete antes ne’e Parlamentu Nasionál loke Request for Quotation (RFQ), kompañia Jepara Meubel ne’ebé mak lokaliza iha Komoro, mak hetan oportunidade hodi halo meza tolu ne’e, no total orsamentu ba meza tolu ne’e la to’o trés mill.

“Meza tolu ne’e la to trés mill, tanba sei haree mós ho kadeira tolu, entaun kuaze kuatru mill i dois. No meza tolu ne’e, diferensa entre Prezidente nian ho Vise na’in rua nian, inklui ninia dezain (design) mós la hanesan.” Cedeliza relata.(Jornalista Julio Salinas Soares)

No More Posts Available.

No more pages to load.