MESSK Monitoriza Subsídiu Pulsa ba Estudante

by -130 views
Longuinhos dos Santos

DILI (Timor Post)—Ministériu Ensinu Superior, Siénsia no Kultura (MESSK) kria ona ekipa hodi halo monitorizasaun ba programa subsídiu pulsa ba estudante ensinu superior iha territóriu tomak.

“Ita-nia ekipa agora halo hela monitorizasaun ba liña internet,” Ministru Longuinhos dos Santos informa ba Jornalista sira iha Palásiu Governu, Dili, Kuarta (11/08/2021).

Nia dehan, kestaun ne’ebé agora estudante barak la simu tenke relata ba universidade relevante hodi rejistu númeru telefone para universidade enkamina ba ministériu aloka orsamentu.

“Iha buat rua ba estudante sira la asesu primeiru númeru telefone blokeia, segundu la rejistu iha universidade tanba ne’e kuandu la tama tenke informa ba universidade,” nia dehan.

Entretantu, antes ne’e, Senadu Fakuldade Edukasaun Arte No Humaniora UNTL, Lázaro Boavida, hatete, nia estudante sira seidauk hetan subsídiu pulsa husi telekomunikasaun, maske governu asina ona akordu iha fulan kotu.

“Ami ba husu ona klarifikasaun iha Vise Reitór Asuntu Akadémiku, ami hetan resposta katak lista ne’ebé sira submete ba ministériu ensinu superior ne’e la’ós lista atualizadu, ida ne’e signifika sira laiha liña koordenasaun ho parte fakuldade no departamentu,” nia hato’o ba Timor Post iha kampus UNTL Liseu, Tersa (10/08).

Nia dehan, problema segundu mak sira ne’ebé servisu ho ministériu ensinu superior laiha liña koordenasaun atu haree dadus estudante sira nian kona-ba númeru kontaktu atualizadu, no problema ida tan mak liña koordenasaun iha UNTL laiha.

“Agora problema ne’ebé akontese mak estudante balun hetan pulsa ami barak liu mak seidauk hetan. Tanba ne’e mak ami senadu hahú ohin rekolla fila fali dadus estudante no ami sei halo reklama iha semana oin,” nia hatete.

Kuandu pulsa ne’e la to’o nafatin ba estudante sira depois reklama mak nafatin la hetan mak estudante sira sei ba hasoru direita ministériu ensinu superior, siénsia no kultura, no mós halo petisaun ba parlamentu atu buka tuir.

Iha fatin hanesan, estudante Izaías Agostu Freitas, haktuir tuir nia hatene estudante barak seidauk hetan pulsa, maibé lahatene tanba saida mak estudante balun de’it mak simu pulsa balu seidauk.

“Ami seidauk hetan subsídiu pulsa husi governu, ami hein hela. Ami barak mak seidauk simu balun simu tiha ona,” nia hatete.

Tuir nia katak, durante ne’e estudante sira hatama ona naran kompletu no númeru telefone, maibé lahatene razaun saida mak agora estudante balu hetan ona balu seidauk.

Iha fatin hanesan, Koordenadór ONG Timor-Leste Coalition for Education, Jose Monteiro, hatete sala ne’e husi governu no Parlamentu Nasionál tanba husu tiha osan no aprova tiha mak foin halo planu.

“Ita ne’e problema boot mak ita husu tiha osan mak prepara planu, parlamentu sira mós halo sasán arbiru de’it tanba atu aprova osan tenke ba planu detail. Labele diskute de’it argumentu,” nia kestiona.

Nia haktuir, buat ne’ebé parlamentu haluha mak planu detallu ne’e katak se mak atu simu? Simu sá fulan? No ninia prosesu ne’e hanesan ne’ebé para fasil ba parlamentu atu halo fiskalizasaun. (ono)

No More Posts Available.

No more pages to load.