Merkadu Manleuana Menus Komprador

by -103 views
Produtu Merkadu Manleuana. (Foto TP/Amélia Babo)

DILI-Negosiante merkadu Manleuana ulun mamar hodi kumpre regra konfinamentu obrigatóriu relasiona ho propagasaun Covid-19 variante delta ne’ebé agrava iha sidade kapitál ne’e, so ke ladun iha komprador.

Governu liuhusi Konsellu Ministru deside implementa hikas konfinamentu obrigatóriu durante loron hitu (27 Agostu too 02 Setembru) iha munisipiu Dili tanba numeru surtu covid ne’ebé aumenta maka’as husi loron ba loron iha sidade Dili.

Tuir observasaun ne’ebé Timor Post halo iha merkadu Manleuana, Sesta (27/08) ne’e katak negosiante barak hanesan fa’an roupa obralan, sapatu no kuda ai funan fresku no mini restaurante balun taka no iha merkadu refere laiha transporte públiku hanesan mikrolete no taxista la halo movimentu hanesan baibain.

Fontes konfirmadu negosiante mini restaurante balun iha merkadu refere, preokupa tebes ho implementasaun konfinamentu domisiliariu obrigatóriu tanba fó impaktu tebes ba povu ki’ik sira ninia moris.

“Ami povu depende liu ba ami ninia produtu ka atividade diariu hanesan faan sasan no halo netik buat ruma para hetan osan,” dehan fontes konfirmadu ne’ebe lakohi publika ninia identidade ba publiku, ba Timor Post iha merkadu Manleuana, Sesta (27/08).

Nia preokupa, tanba dalan taka, ema hotu sulan iha uma no lori osna mak atu sosa hahán kuandu sulan iha uma. Ukun na’in sira koalia iha parlamentu, fulan sira simu osan.

“Kuitadu ami sulan tiha depois hetan osan husi ne’ebé hodi sustenta ba família uma laran. Ami povu nia moris depende ba ami ninia negosiu, hanesan faan sasan no tein hahan ruma fa’an ba ema sosa maka ami hetan osan, se ema lá sosa ami la hetan osan,” nia kestiona

Nia dehan, implementa konfinamentu obrigatoriu halo sira nia sasan, produtu la folin no barak mak sei soe estraga ba lixu tanba ema sosa nian menus.

“Merkadu laran sepi loos hanesan ne’e sasán la folin no soe estraga ba lixu hotu, osan inan mós lakon hotu. Ami la eziji governu atu fó osan ba ami povu kiik sira,maibé ami hakarak ukun nain sira labele estende konfinamentu domisiariu obrigatoriu atu nune’e ami povu bele moris livre hala’o ami nia negosiu no bele hetan rendimentu diak hodi sustenta ba família uma laran,” nia dehan.

Negosiante ne’e rekonese, katak moras covid ne’e moras global, nasaun hotu afeta moras ida ne’e maibe nasaun sira seluk, sira nia governu tau matan ba ninia povu durante lockdown, prepara aihan nesesidade baziku, nune’e povu izola iha uma sente hakmatek, maibe iha Timor ne’e la’e fali.

“Governu seidauk preparadu implementa konfinamentu obrigatoriu, oinsa bele garante povu ninia moris iha situasaun inserteza nia laran. Povu hakilar hamlaha iha baze, ukun nain sira tur iha AC laran finje la rona povu ninia preokupasaun. Sira tau liu interese politika duke interese povu nian,” nia kritika.

Entretantu, Jestor Merkadu Manleuana, Julio Caldas ba Timor Post hateten sira fo ona avizu ba negosiante sira kona ba desizaun governu implementa KO ne’e no husu sira atu kumpri regra ne’ebe iha.

“Ami kontrola maximu iha merkadu refere, fó avizu ba negosiante ka komprador sira katak ita hotu kumpri ba desizaun husi governu, labele halibur malu liu ema nain sanulu ba leten no fa’an sasan tenke uza maskara, fase liman no labele halibur malu, ida ne’e ami sempre fó avizu ba negosiante no sira kumpre regra prevensaun covid-19,” Caldas hateten.

Kona ba negosiante ne’ebé la kumpre regra, nia dehan, tenke simu sansaun, karik ulun to’os fila uma deskansa atu nune’e labele prejudika fali ema seluk.

“Ha’u husu ba negosiante no komprador sira kumpre regra bazeia dekretu lei ne’ebé fó sai ona no ami aplika iha merkadu refere kona-ba vendedor no komprador tenke kumpre regra husi governu,” nia husu.

Julio haktuir, fatin ida vendedor ida maka bele fa’an sasán, labele liu ema na’in rua no labarik ki’ik labele mai iha merkadu.

Portantu, iha merkadu sasán ne’ebé kontinua fa’an maka produtu lokál, ne’ebé bele uza han,e fa’an modo no ai-fuan no seluk tan bele kontinua.

Maibé roupa obralan, nia hateten, la mensiona entaun negosiante sira kontinua fa’an hela roupa obralan maibé bazeia ba orden husi boot, desizaun dehan negosiante obralan hapara sira.

Tuir observasaun diariu Timor Post nian anota iha terenu iha merkadu refere iha oras tuku 9:00 negosiante produtu lokal halo negosiu normal, maibé negosiante obralan balun taka no laiha transporte publiku la halo movimentu hanesan mikrolete no tasista no menus komprador kompara ho antes ne’e. (asb)

No More Posts Available.

No more pages to load.