Menzies Lidera Diagnóstiku no Vijilánsia ba moras Infeksiozu iha Timor-Leste

by -119 views

DILI (Timor Post)— Menzies hanesan Institutu peskiza médiku koñesidu husi Australia ne’ebé dedikadu atu mellora saúde no moris-diak ba Aboriginal no Torres Strait Islanders sira nian, no lider iha peskiza global no tropikal nian kona-ba moras sira ne’ebé mak fó ameasa ba vida, Menzies kontinua interpreta peskiza ba iha parseria no programa sira ne’ebé efetivu iha komunidade sira iha Australia no rejiaun Ázia Pasífiku.

Liuhusi komunikadu ba imprensa ne’eé Timor Post asesu iha Loron 31 Agostu 2021, haktuir, Menzies dezenvolve ona inisiativu foun ida hodi ajuda halo di’ak liu tan diagnóstiku no vijilánsia ba moras infeksiozu sira iha Timor-Leste.

Malária, Tuberkuloze (TBC), COVID-19 no HIV (MATCH) nia diagnóstiku no vijilánsia iha Timor-Leste, sei lidera husi Menzies School of Health Research (Menzies) hamutuk ho parseria ne’ebé eziste ona ho Ministériu Saúde Timor-Leste, liu-liu iha Timor-Leste nia Laboratóriu Nasionál Saúde (LNS) no Departamentu Kontrolu Moras.

Projetu MATCH TL ne’e sei servisu besik liu ho Ministériu Saúde Timor-Leste hodi hadi’a di’ak liu tan asesu no kualidade husi teste diagnóstiku laboratóriu nian ba moras Malária, TBC, COVID-19 no HIV iha Timor-Leste.

Lider ba Menzies Timor-Leste nia projetu sira, Josh Francis haktuir katak MATCH TL sei ajuda rezolve sofrimentu a’as kona-ba morbidade no mortalidade, husi moras infeksiozu endémiku sira iha Timor-Leste.

“Resposta saúde públika nian ba Malária, TBC, COVID-19 no HIV ne’e enfrenta dezafius barak, inklui asesu ba teste laboratóriu nain,” hatete husi Dr Francis.

“Inisiativu foun ida ne’e sei ajuda halo di’ak liu tan kontrolu ba moras no fortalese sistema saúde nian iha Timor-Leste.”

LNS Timor-Leste nia Diretora Ezekutivu Endang da Silva hateten, kolaborasaun hamutuk ho Menzies liu husi MATCH TL ne’e sei permite sira atu kontinua fortalese sira nia kapasidade.

“Liu husi suporta no kolaborasaun husi ami nia parseiru saúde sira, LNS konsege rezolve dezafiu sira ne’ebé mak ami enfrenta, no ami fiar katak Menzies nia investimentu sei reforsa liu tan kapasidade LNS nian atu preparadu iha futuru hodi fornese servisu sira ne’ebé mak Timor-Leste presiza,” hateten husi Sra. da Silva.

Finansiamentu ba kolaborasaun ida ne’e, hanesan parte ida husi Australia nia kompromisu millaun $242 ba Global Fund hodi luta kontra AIDS, Tuberkuloze no Malária. Foku husi servisu ida ne’e dezenvolve ona iha parseria entre Australia no Global Fund no sei maximiza impaktu relasionadu ho investimentu Global Fund nian.

“Doasaun ne’e projetadu hodi hasa’e impaktu husi Global Fund nia servisu iha ita nia rejiaun liu-husi fortalesimentu laboratóriu iha nasaun hodi realiza servisu esensial, husi halo teste no diagnóstika,” hateten husi Australia nia Embaixadora ba Seguransa Saúde Rejional Dr Stephanie Williams.

“Sei kontinua mos atu reforsa parseria teknikal entre péritu sira iha Australia nia instituisaun sira nível mundial no parseiru regional sira.”

MATCH TL finansiadu husi Governu Australia, Departamentu Negósiu Estrangeirus no Komérsiu. (*/cao)

No More Posts Available.

No more pages to load.