Membru husi FRETILIN-PD Tama Governu Daualu, Presiza Tetu Kestaun Legais no Lejitimidade Programátika

by -485 views

DILI—Governu daualu lideradu Primeiru Ministru Taur Matan Ruak hahoris husi Aliansa Maioria Parlamentar (AMP) ne’ebé kompostu husi partidu CNRT, PLP ho KHUNTO. Forsa polítika ne’e hetan oportunidade ne’e tanba konsege hetan kadeira 34 iha eleisaun antesipada 2018.

Tanba ne’e, liga ho Primeiru Ministru Taur Matan Ruak hatama ona naran membru governu na’in-6, lima husi FRETILIN no na’in-ida husi PD ba Prezidente Repúblika Francisco Guterres Lú Olo atu hetan posse, presiza tetu kestaun legais no lejitimidade programátiku.

Jurista Senior Avelino Coelho subliña, primeiru ministru kompleta membru governu sira ne’e normal hela tanba ida-idak ho nia kompeténsia. Katak, primeiru ministru lori membru governu sira ba prezidente repúblika fó posse tuir artigu 106 alinea daruak. Maibé, depende se prezidente repúblika haree estatutu governu daualu.

“Agora depende prezidente haree se oitavo governo ne’e nia estatutu. Oitavo governu ne’e mosu husi Aliansa Maioria Parlamentar ida. Agora problema entre aliansa ne’e rejolve tiha ona ka seidauk. Se seidauk rejolve, sei iha hela kestoens de lejitimidade ho legalidade, tanba aliansa ne’e CNRT, PLP, KHUNTO mak forma governu. Agora iha governu mos membru CNRT sei iha laran. Agora haree situasaun ne’e halo oinsá,” Avelino hatete ba Timor Post via telefone hodi hatutan, kestoens legais no lejitimidade programátika ne’e presiza tetu.

Entretantu Avelino dehan, petisaun ne’ebé asina husi deputadu sira liuliu husi CNRT no advogadu sira lori ba tribunál rekursu hodi kontra desizaun sira durante ne’e prezidente repúblika foti konsideradu iha violasaun todan ba nia kompeténsia rasik, liuliu la fó pose ba membru sira husi CNRT na’in 7 no KHUNTO nia ema na’in-2, ne’ebé prosesu normal ida.

Katak, Avelino dehan, la fó impaktu ba prezidente repúblika atu fo pose fali membru governu foun ne’ebé primeiru ministru hatama ona lista hodi kompleta membru governu, bainhira la xoke ho kestaun legais no lejitimidade programátiku.

Membru governu ne’ebé Prezidente Repúblika Francisco Guterres Lú Olo la fó posse mak hanesan, Ministru Finansa, Helder Lopez, Ministru Turizmu, Komérsiu no Indústria, Francisco Kalbuadi Lay, Minstru Asuntu Kombatente no Libertasaun Nasionál, Virgílio Smith, Ministru Saúde, Sérgio Lobo, Ministru Interiór (deklara rezigna-aan ona), António Verdial, Vise-Ministru Justisa, Amandio Benevides, Vise-Ministru Negósiu Estranjeiru no Kooperasaun, José Turquel.

Membru governu foun ne’ebé primeiru ministru hatama ona lista ba prezidente repúblika mak hanesan, Fernando Hanjam, Ministru Finansas(MF); Meta Malik, Ministru Antigus Kombatetes (MAK); Odete Maria Freitas, Ministra Saúde (MS); Faustino Cardoso, Ministru Administrasaun Estatál (MAE); Manuel Vong, Ministru Turizmu Komersiu Industria (MTKI) no Inácia Texeira, Vise Ministra Turizmu Komersiu Industria (VMTKI). (cao)  

No More Posts Available.

No more pages to load.