Membru Governu Na’in-Hitu Semo ona ba Partisipa Expozisaun iha Dubai

by -417 views
Foto Espesial

DILI (Timor Post)—Membru governu na’in-hitu hamutuk ho delegasaun na’in-113 semo tiha ona ho aviaun Citilink liuhusi Bali-Indonézia ba nasaun Uni Emiradu Arabe hodi partisipa iha expozisaun internasional iha sidade boot Dubai.

Membru governu hirak ne’e mak hanesan, Ministru Koordenadór Asuntu Ekonómiku (MKAE), Joaquim Amaral, Ministru Petróleum no Minerais (MPM), Víctor da Conceição Soares,  Ministru Transportes no Komunikasaun (MTK), José Agostinho da Silva, Ministru Agrikultura no Peska (MAP), Pedro dos Reis, Ministru Turízmu Komérsiu no Indústria (MTKI), José Lucas do Carmo da Silva, Vise Ministru Negósiu Estranjeiru no Kooperasaun (MNEK), Juliăo da Silva no Vise Ministru Turizmu Komérsiu no Indústria (MTKI), Domingos Lopes Antunes.

Membru governu hirak ne’e ho ida-idak nia funsionáriu iha delegasaun hamutuk 134 inklui na’in-14 aranka uluk ona iha loron 13 Setembru ne’e ba halo preparasaun ba expo, sei hela iha Dubai to’o 21 Outubru 2021.

Delegasaun husi Timor Leste sei selebra loron nasional Proklamasaun Independénsia 28 Novembru iha Dubai, iha loron 18 Outubru ho atividade hasa’e bandeira RDTL.

Durante iha expozisaun, timoroan sira mós sei halo aprejentasaun dansa kultural no atrasaun hatudu identidade nasionál.

“Delegasaun hamutuk ho membru governu sira atu halo aprezentasaun kulturál, ita ba expo Dubai atu selebra ita nia loron nasionál iha ne’ebá,” Ministru Joaquim Amaral subliña ba Jornalista sira iha Aeroportu Internasionál Nicolau Lobato, Dili bainhira ho delegasaun atu dezloka ba Dubai, Kinta (14/10/21).

Expozisaun ne’ebé hala’o ona iha loron 01 fulan Outubru 2021 to’o 31 Marsu 2022 ne’e, Timor Leste aprejenta produtu liu 50 kompostu hosi produtu agríkola, artezanatu, minerál no tais.

Nasaun hamutuk 192 mak partisipa iha expozisaun ne’e.

Maske nune’e, antes ne’e mosu pro no kontra iha rai laran. Balun kontra la aseita partisipasaun Timor Leste iha eventu ne’e tanba presiza hadia uluk produsaun rai laran mak lakon osan boot ba halo promosaun iha rai liur.

Maske nune’e, governu defende katak expozisaun ne’e oportunidade di’ak ba Timor Leste.

Orsamentu ba preparasaun expo Dubai mai hosi Orsamentu Jerál Estadu tinan fiskal 2021 ho total milaun $2,1 inklui apoiu internasionál. (cao)

No More Posts Available.

No more pages to load.