Membru F-FDTL Foun husi Munisípiu-7 Aprezenta-an, Komandu Elemina Na’in-Tolu

by -4.081 views
Imajen ne'e hatudu formatura iha Kuartel Jeral Fatuhada, Dili. Foto Venidora Oliveira

Jornalista Venidora Oliveira / Editór Noémio Falcão

DILI (Timor Post)—Membru FALINTIL-Forsa Defeza Timor Leste (F-FDTL) husi munisípiu-7 hamutuk na’in-239, Kuarta (22/09/2021) aprezenta-an iha Kuartel Jerál Fatuhada-Dili. Entretantu na’in-tolu eleminadu tanba rajaun la hanesan.

Membru husi munisípiu hitu ne’e inklui Dili na’in-48, Likisá na’in-27, Bobonaru na’in-17. Ermera na’in-53, Aileu na’in-30, Manatutu na’in-21 no Baukaun na’in-43.

Na’in tolu ne’ebé komandu deside elimina ne’e ida-idak  ho inisiál JMDS tanba envolve iha grupu arte-marsiálmaibe la deklara ho onestu, seluk fali ho inisiál JPA problema pasadu, no na’in-ida la marka prezensa iha data aprezentasaun. Na’in tolu ne’e hosi Dili, Likisa, no Ermera.

Kapitaun Infantaria Rui Soares iha Kuartel Jerál subliña, atividade aprezenta-an ne’e ho objetivu atu halo reverifika naran ba militar foun  sira ne’ebé pasa iha selesaun.

“Tanba kuandu la mai entaun reprovadu, ema ne’ebé maka la mai sei iha subtituisaun, rezerva barak, ema hakarak tama forsa,” Rui afirna.

Kona-ba na’in ida ne’ebé komandu elemina ligadu ho arte marsiais, nia dehan iha forsa onestidade importante, balun mete iha arte-marsiál mais nunka deklara-an no balun ne’ebé deklara-an ekipa selesaun konsidera.

“Ida ne’e mete artemersiais maibé nunka deklara hosi Likisa nian, ha’u hatete onestidade importante, ne’e maka forsa husu, atu mete arte-marsiál saida-saida onestidade importante, tanba forsa armada hakribi aktu envolve iha arte marsiais, tanba tama iha forsa armada atu servi,” Kapitaun Rui hatete.

Nia dehan, iha 27 dader militar foun sira ne’e sei ba Metinaru hodi tuir formasaun, maibé hotu-hotu tenke tuir vasina pelumenus doze dahuluk.

Antes hakotu, nia dehan, ba feto sira aban (23/09) sei ba iha kuartel jeral hodi tuir teste urine hodi serteza katak la isin rua, tanba ba kadetes feto sira bainhira identifika isin rua sei elemina. (ven)

No More Posts Available.

No more pages to load.