Membru F-FDTL Baukau Simu Vasina AstraZeneca

by -64 views
Imajen ne’e hatudu pesoál saúde sira vasina membru F-FDTL-CT. Foto TP: Caetano Guterres

(Jornalista Caetano Guterres / Editór Noemio Falcão)

BAUKAU (Timor Post) – Membru FALINTIL-Forsa Defeza Timor Leste-Komponente Terestre (F-FDTL-CT) Lanud Baukau hamutuk na’in-250 simu vasina AstraZeneca doze dahuluk no daruak tanba membru hirak ne’e hola parte iha liña frente.

“Tanba de’it militár dehan front line entaun ami tenke-ser simu vasina tanba ami husi komponente terrestre mós servisu iha fronteira barak liu,” Xefe Operasaun F-FDTL-CT lanud Baukau Kapitaun Helio Filipe Dias Quintas ba Timor Post Segunda (21/6) iha kampaun CT Lanud Baukau.

Kapitaun Helio haktuir, nia parte hala’o servisu mós ami servisu iha postu rua, postu ida iha Laivai no postu ida iha Vemasse entaun obrigatóriu tenke simu vasina.

Nia dehan, membru F-FDTL-CT iha 493 kuaze porsentu 90 mak simu ona vasina tanba balun simu iha Lanud Baukau, balun iha fronteira no balun fali simu iha postu fronteira Laivai no Vemasse.

Helio esplika, durante membru F-FDTL-CT simu tiha vasina AstraZeneca maioria la hetan reasaun tanba maioria forsa hirak ne’e loro-loron halo exersísiu, so iha de’it membru balun mak hetan isin manas uitoan.

“Iha de’it membru balun hetan isin manas uitoan maibé kuaze maioria sira la hetan reasaun ruma husi vasinasaun ne’e tanba sira esercisiu hela de’it entaun sira nia isin forte be la iha problema”, dehan Helio.

Xefe sentru saúde Bucoli, Diego A.R.Fraga hatete, vasinasaun AstraZeneca ba membru F-FDTL-CT hala’o tanba iha kooperasaun no hetan organiza direta husi komandante komponente terreste lanud Baukau, atividade vasinasaun ne’e fó mós vasina ba família membru F-FDTL sira tanba hetan autorizasaun.

“Ita hatene katak vasina ne’e atu prevene moras kovid-19 no mós atu hasa’e ita ema nia imunidade, I bele proteje ba ema ida-idak no ita nia família, entaun ita hatene katak ida ne’e hasa’e ita nia imunidade, vasina ne’e mós komandante husi para ami halo vasina ba família membru forsa sira nian, I ami konsege duni vasina komandante sira nia señora sira ho sira ninia oan sira iha ne’e”, dehan Diego.

Iha tempu hanesan, Bernardino Freitas Vas hanesan membru F-FDTL- CT sente kontente ho vasinasaun AstraZeneca doze daruak nian tanba bele ona halo movimentu livre ba mai husi fatin ida ba fatin seluk, aleinde ne’e beneifísiu seluk bele hasa’e imunidade ema ida-idak nian.

“Ha’u pesoalmente depois de simu tiha vasina AstraZeneca segundu tuir ita nia boot sira ko’alia katak depois de simu vasina segundu ita sei la’o bebas, depois vantajen seluk reforsa tan ita nia imunidade”, dehan Bernardino.

Tuir planu vasinasaun iha component terrestre lanud Baukau hala’o durante loron hahú husi Sábadu, Segunda no Tersa Feira aban. (Lee Notísia Seluk iha Jornál Diáriu Timor Post)

No More Posts Available.

No more pages to load.