MEJD Presiza Halo Avaliasaun Ba Eskola Sira

by -49 views
Ministru Edukasaun Joventude no Desportu (MEJD), Armindo Maia. (Foto google)

DILI (Timor Post)—Ministériu Edukasaun Juventude no Desportu (MEJD) presiza halo uluk avaliasaun ba eskola sira hatene matéria ne’ebé mak presiza atu hanorin ba estudante sira, atu labele fó impaktu ba estudante sira tuir ezame.

“Ha’u hanoin ministériu edukasaun presiza atu kontrola másimu no halo avaliasaun ba eskola sira liuliu profesór sira atu hanorin hotu matéria ne’ebé mak importante. Ita labele dehan de’it situasaun ne’e, maibé tenke esforsu mós”, hatete Diretór Organizasaun MAHON, Angelo Fernandes, ba Timor Post iha Bairru Pité, Domingu (08/08).

Nia hatete, tinan rua ona eskola iha munisípiu Dili la’o ladún másimu ne’e afeta ba kualidade edukasaun, tanba hakarak prepara futuru ho kualidade governu tenke tau atensaun mós, labele hotu-hotu dehan de’it situasaun.

“Ita haree tinan rua ona eskola la’o ladún di’ak, ita agora labele ko’alia kualidade, tanba ita nia governu mós dehan de’it situasaun, ida ne’e ita labele ko’alia mós futuru nian”, nia dehan.

Tuir nia katak, agora iha munisípiu sira ezame segundu períodu remata ona, maibé munisípiu Dili seidauk dehan fó tempu ba estudante sira atu tuir prosesu aprendizajen lai más ita haree ministériu edukasaun tenke kontrola hodi halo avaliasaun eskola ne’e la’o di’ak ka lae.

“Ita haree dehan fó tempu ba estudante sira atu tuir prosesu aprendizajen, maibé loro-loron ita haree estudante sira to’o eskola tuku 8, tuku 9 mós sira sei la’o ba mai Estrada nakonu ida ne’e atu foku oinsá”, nia kestiona.

Angelo haktuir, ministériu edukasaun tenke aloka ona osan Konseisaun Eskolár ba eskola sira atu halo preparasaun labele aban atu ezame ona mak aloka ida ne’e fó terus ba eskola liuliu profesór sira atu prepara pontu ezame.(ono)

No More Posts Available.

No more pages to load.