MEJD Ezekuta Ona OJE 2021 40%

by -50 views
Ministru Edukasaun, Juventude no Desportu, Armindo Maia

DILI (Timor Post)—Ministériu Edukasaun, Juventude no Desportu (MEJD), to’o ohin loron ezekuta ona Orsamentu Jerál Estadu (OJE) tinan 2021 ho porsentu 40.

“Ministériu edukasaun ninia ezekusaun serka de 40% ona,” ministru edukasaun, juventude no desportu, Armindo Maia informa ba Timor Post iha edifísiu MEJD, Vila Verde, Kinta (12/08).

Nia dehan, ezekusaun orsamentu atinji 40% ne’e ezekuta ba programa baibain hanesan kapitál menór, saláriu vensimentu, bens servisu. Ba kapitál dezenvolvimentu mak sei lori tempu uitoan liuliu infraestrutura.

“Ita ezekuta ba programa baibain hanesan saláriu vensimentu, kapitál menór, bens servisu,” nia hatete.

Nia informa, MEJD kontinua implementa programa prioridade sira maibé tanba situasaun pandemia Covid-19 mak programa balu seidauk implementa.

“Ita aselera nafatin ida lori tempu uitoan mak kapitál dezenvolvimentu liuliu infraestrutura maibé ita dudu daudauk ona,” nia hatete.

Ikus liu, nia dehan, alende prosesu ba implementasaun infraestrutura, sira mós agora diskute hela planu rekruta profesór ba eskola sira ne’ebé menus profesór iha territóriu laran tomak. (ono)

No More Posts Available.

No more pages to load.