Médiku Na’in-32 Pozitivu, Odamatan Servisu Saúde Manufahi Taka

by -537 views
Imajen ne'e hatudu ambiente iha Sentru Saude Munisipiu Manufahi. Foto TP: Luis Casimiro Lopes

Manufahi (Timor Post)—Konfirmadu médiku na’in-32 pozitivu COVID-19 iha Munisípiu Manufahi no evakua ona ba sentru izolamentu iha Polo UNTL no Kablaki. Nune’e, ohin, Kinta (19/08/2021), odamatan Servisu Saúde Munisipál taka ba públiku.

Diretora Serbisu Saúde Munisipíu Manufahi, Florença Corte Real Tilman rekoñese situasaun ne’e sériu tebes.

Nia haktuir, profesionál saúde sira infetadu moras daet ne’e hafoin tuir treinamentu ida iha salaun Sentru Saúde Manufahi semana kotuk.

“Hafoin balun hetan sintomas ami hasai kedas teste swab iha ospital referral Maubisse rezultadu pozitivu neduni sira ne’ebé besik ami foti hotu hetan rezultadu positivu hotu,” Diretora Florença haktuir.

Pesoál saúde sira hetan pozitivu ne’e kompostu husi médiku jeral, infremeiru, parteira, formasista no analista.

Nia hatutan, sidadaun profesionais nain 32 ne’ebé hetan pozitivu ne’e husi postu saúde Turiskai no Same Villa. Halo fila fali swab test ba profesionais saúde husi postu Alas ho postu Fatuberlio.

“Sira ne’ebé ami foin halo teste swab haruka ba Dili ne’e mak hetan hotu pozitivu ami planu Serbisu Munisipíu Saúde (SMS) Manufahi no sentru saúde Same ami tenki taka provizóriu tanba rekursu la to’o,” Diretora Florença subliña.

Nia dehan, husi ema na’in-32 ne’e koloka iha sentru izolamentu Polo UNTL na’in-15, Kablaki na’in-17.

Diretora Florença mós konfesa nia iha sintomas mear no teste ona swab negativu maibé kontinua konfirma rezultadu ba Dili hodi hare tanba agora mós rai malirin.

Total profesionais saúde iha Munisípiu Manufahi hamutuk na’in-51 rejime jeral no rejime espesial na’in-200 enkuantu kobre ba sentru saúde Same villa hamutuk na’in-100.

“Atu Evita virus refere tenki kumpri nafatin regras fase liman, uza maskara no distansiamentu sosial maske kompleta ona vasina ba dala rua. Enkuantu atu reduz númeru refere husu ema hotu tenki hakbesik a’an ba sentru ne’ebé besik hodi hetan vasina,” Diretora Florença subliña.

Observasaun Timor Post nota katak, Serbisu Munisipíu Saúde (SMS) Manufahi ba loron ohin iha tuku 10 odamatan kada departamentu saúde ambiente no promosaun edukasaun saúde, fatin moras la hadaet, moras hadaet, finansas, nutrisaun, administrasaun, lojístika, formasaun no fatin ba xefe departamentu programatiku taka. (lcl)

No More Posts Available.

No more pages to load.