Matebian Armindo Nia Oan Halai Lakon Husi Teste Swab

husi -197 views

(Reportájen Olga Soares/Editor Suzana Cardoso)

DILI (Timor Post) – Lakohi hetan swab husi ekipa vizilansia epidemolojia, familia Matebian Armindo Borges (48) ne’ebé mate polemika inserteza hosi deskonfia Covid-19 iha Sentru Izolamentu Vera Cruz, balun halai lakon.

“Ita ohin ba hasoru. Ita hare familía rasik lakohi koopera ho saúde. Ami pasiensa. Tanba ami hanesan ema saúde preokupa ba ema nia saúde. Buka negosia ho familía sira hotu iha uma laran hodi hetan teste swab. Husi komvense ne’e ita hetan de’it familía na’in tolu.”

Hateten Diretora Servisu Saúde Munisípiu Dili, Agustinha Segurado ba jornalista hafoin fila hosi Matebian Armindo Borges nia uma iha Bairru Kampu Merdeka, Aldeia Moris Foun “B”, Suku Komoro, Dili iha loron Domingu, (18/04/2021).

Tuir observasaun Timor Post, maizu menus tuku 14:00 OTL ekipa vizilansia epidemolojia, akompañia hosi Diretora Servisu Saúde Munisípiu Dili, Agustinha Segurado, Seguransa Polísia Nasionál Timor-Leste (PNTL), Batalliaun Ordem Públika (BOP) no autóridade lokál hakat ba iha familía matebian Armindo nia uma.

Sei nafatin husi observasaun Timor Post, ekipa tuun hosi karreta foin mak hakat ba iha odamatan oin hato’o komprimenta ba familía Matebian Armindo, lakleur simu tolok hosi familía no lakohi koopera atu hasai teste swab.

Diretora Agustinha esplika, objetivu ekipa saúde atu komvense ho familía matebian Armindo nia kaben ho nia oan feto ne’ebé iha loron hirak liu ba sira nia rezultadu teste swab pozitivu, tenki lori ba asegura iha sala izolamentu.

Katak Agostinha, nu’udar autoridade saúde nafatin buka estratéjia atu lori saúde ba ema hotu. Maske lakohi koopera hodi familia ne’ebé halibur iha uma laran halai lakon hotu no lakohi hetan swab. Maibé hafoin negosia, familia na’in tolu anterior hetan pozitivu hakarak halo teste swab ba dala rua nian.

Agostinha argumenta, foti teste swab ba dala rua nian ne’e para bele iha serteza ba familía konaba moras pandemia Covid-19. Hein ninia rezultadu oinsá. Ekipa vizilansia epidemolojia sei enkorajen ba matebian nia oan sira ne’ebé halai se’es hosi teste ne’e atu fuan boot simu rezultadu.

“Hosi teste swab matebian Armindo nia kaben ho nia oan feto ne’e husu ba laboratorium nasional saúde atu fó prioridade no urjente. Ne’ebé oras-oras tan nia rezultadu sei fó sai kedas. Karik pozitivu sira tenki koopera. Ekipa saúde nian sei mai foti lori ba izolamentu ne’ebé prepara ona,” tenik Agostinha.

Nia hateten, kolabora ona ho autoridade lokál para halo teste swab ne’e laos deit ba familia iha uma laran maibé sei halo mós ba viziñu hodi halo prevensaun ba Covid-19 nia dait ba ema besik 300-resin iha bairru ne’e.

Enkuantu Matebian Armindo nia kaben hateten, nia parte lakohi koopera atu hasai teste swab. Tanba antes ne’e swab ne’ebé ekipa hasai la ho dignu.

“Ami loron hirak ona depois halot tiha mate isin ami fila mai uma, ami ho vizinhu sira di’ak de’it. Laiha moras ruma. Mezmu antes ne’e suspeita ona ami pozitivu Covid-19. Maibé ami sente normál. Tanba ne’e mak ami lakohi ba izolamentu,” deklara husi Matebian Armindo nia kaben.

Hanesan públika tiha ona, Matebian Armindo Borges hakotu ís iha loron Domingu, (11/4/2021) iha maizu menus tuku 19:00 hafoin hetan morás grave raan sai husi tilun, ibun no oin bubu. Lori ba Hospital Nasionál Guido Valadares (HNGV) teste swab katak Covid-19, nune’e lori mai mate iha dalan klaran atu ba sentru izolamentu Vera Cruz. (Lee notisia kompletu iha jornál Timor Post)