Marsu CCF Reuni Kongresu FRETILIN, Alkatiri husu Adversáriu Estuda Didi’ak Estatutu

by -29 views

Timor Post (20/02/2021)—Sekretáriu Jerál FRETILIN, Marí Bim Amude Alkatiri hatete, iha fulan Marsu tinan ne’e Komité Sentrál FRETILIN (CCF sigla Portugués) bele reuni ona preparasaun sira ba kongresu partidu nian.

“Fulan Marsu CCF bele reune,” Alkatiri ba Timor Post, Sábadu (20/02/2021) bainhira konfirma kona-ba públikasaun ne’ebé Eis Deputadu FRETILIN Manuél Castro públika tutan iha nia konta Facebook.

“Ba ha’u nia adversáriu ha’u hatene atu hasoru no desmistifika. Ba sira ne’ebé mehi atu sai hau nia adversáriu hau fó tempu ba sira atu “arriska” ka foti risku. Tuir mai, tempu ba sira ida de’it: buka dalan seluk atu simu konsikuénsia no halo polítika. Tempu ba sira besik to’o ona ba rohan. Estuda didi’ak Estatutu,” Alkatiri hakerek iha nia estatutu Whatsapp.

Bainhira Manuél Castro públika tutan iha nia konta Facebook, mosu komentáriu oioin. Eis Deputadu Osório Florindo parte ba grupu Rui Maria de Araújo fó resposta ba komentáriu ida ne’ebé subliña husik ba Alkatiri lidera nune’e bele infrenta momentu kursial ho nota laiha líder ida atu hasoru adversáriu CNRT.

Osório dehan, “FRETILIN la’ós ida mesak to’o rohan laek. Estatutu partidu mos dehan laiha kargu vitalísio. Ita hotu nia objetivu hakarak haboot no haburas partidu, dala ruma estratéjia mak la hanesan tanba ne’e mak sai fali debate públiku ne’e”.

Entretantu antes ne’e, Eis Primeiru Ministru Rui Maria de Araújo deklara ona nia intensaun kandidatu ba Sekretáriu Jerál FRETILIN ba periodu tuir mai.

Relasiona ho deklarasaun ne’e, iha debate ida ne’ebé Tve realiza, apoiante ba Rui Araújo, eis Deputadu FRETILIN, Osório Florindo afirma, “Kamarada Doutor Rui Maria de Araújo la’ós hakfodak toba hader mai ko’alia nia kandidatu”.

Osório hatete, dalan legál forte tebes fó biban ba Doutór Rui kandidata-an hodi lidera FRETILIN no gia prosesu dezenvolvimentu nasionál.

“Dalan legál ida fó ba nia atu kandidatu maka ami nia estatutu FRETILIN nian, iha ne’eba iha kritériu sira. Ha’u hanoin Doutór Rui lee hela estatutu, nia sente prienxe kritériu atu kandidata-an sai líder partidu hanesan sekretáriu jerál,” Osorio subliña. (cao)