MAPKOMS Husu Jornalista Sira Tenke Servisu ho Profesionál

by -215 views
Ministru Asuntu Parlamentár no Komunikasaun Sosiál (MAPKOMS), Francisco Jerónimo

(Reportajen Cardenio Alves/Editor Mateus da Cruz)

DILI (Timor Post)-Atu garante kualidade informasaun ba públiku, jornalista sira tenke servisu ho profesionál liu-liu tenke hatene oinsá hakerek notísia ida ho di’ak tuir elementu sira 5W+1H, tanba ida ne’e maka save importante ba jornalista sira.

“jornalista sira tenke servisu profisionál liu husi 5W1H, tanba Ida ne’e mak sai save importante liu ba jornalista sira hodi garante kualidade no hetan apresiasaun di’ak husi parte hotu-hotu,” hatete Ministru Asuntu Parlamentár no Komunikasaun Sosiál (MAPKOMS), Francisco Jerónimo, bainhira partisipa iha konferénsia TLPU iha Salaun Delta Nova, Sabadu, (19/02).

Nia hatete, governu iha prontidaun atu fó apoiu ba asosiasaun jornalizmu sira maibé importante maka tenke jere orsamentu ho di’ak atu nune’e buat hotu bele la’o tuir planu.

“Ha’u hanoin iha tinan kotuk Ita boot Sira la hetan osan, iha problema ruma husi Ita boot sira Nia organizasaun rasik iha mandatu primeiru failansu iha relatóriu, nune’e ha’u espera katak husi parte prezidente atuál bele halo programa sira ne’e ho di’ak,” nia dehan.

Iha fatin hanesan, Prezidente TLPU, Candido Alves, hatete, daudaun TLPU halo review atu retifika  estatutu TLPU nian.

Nia husu ba jornalista sira liu-liu membru TLPU atu tenke hatudu nafatin profisionalizmu liu hosi informasaun ne’ebé publika.

Maibé nia mós husu ba públiku atu labele taka dalan bainhira jornalista sira halao sira niak naar iha terrenu.

“Ha’u nu’udar Prezidente TLPU Hau hanoin ba públiku hotu-hotu, bainhira Ami jornalista to’o ona iha Fatin, labele taka dalan, karik halo buat ne’ebé la di’ak, labele julga sita iha kampu maibé julga tuir instituisaun, tanba jornalista haklaken lia loos no nia labele hatán direta,” tenik. (Lee notisia seluk iha jornal Timor Post/asesu youtube Timor Post)

No More Posts Available.

No more pages to load.