MAPE-KXG Hasa’e Bandeira iha Ailok-Laran, “Labele Nega no Desmistifika Xanana”

by -877 views
Foto Espesial

MAPE-KXG Hasa’e iha Ailok-Laran, “Labele Nega no Desmistifika Xanana”

Dili (Timor Post)— Movimentu Apoiu Pessoa Eminente-Kayrala Xanana Gusmão (MAPE-RXG) offisialmente hasa’e Bandeira RDTL no Partidu CNRT nian iha Laletek Maloa Ailok-Laran, Aldeia Buka Fini, Suku Bairro-Pite, Dili.

Iha serimónia hasa’e bandeira iha loron 20/11/2021 ne’e, Konsilleiru Prinsipál MAPE-KXG, Alexandrino Xavier de Araújo (AXA) fó posse ba estrutura munisipal no movimentu universitáriu.

Foto Espesial

AXA husu ba estrutura atu hala’o servisu maka’as konsolida forsa boot liu tan hodi fó apoiu ba Kayrala Xanana Gusmão liuhusi Partidu CNRT iha eleisaun prezidensial 2022 no eleisaun parlamentar 2023.

“CNRT ida uluk no agora nia nain no mahon ida de’it, mak Maun Boot Kayrala Xanana Gusmão, CNRT ida uluk hodi halibur unidade Nasionál husi lorosa’e to’o loro monu, hodi hetan ukun rasik an, CNRT ida ohin, sei nafatin ho Maun Boot hodi halo dezenvolvimentu,” AXA subliña iha nia intervensaun.

Nia hatutan, Xanana ida uluk no ida agora no Xanana ida aban, nafatin Xanana ida de’it, Xanana nunka tau dúvidas ba nia povu rasik iha situasaun difisil nia laran.

“Nia nafatin fó esperansa. Loos duni maske haan tempu naruk maibé ukun-an ne’e sai realidade.

Timor nia dignidade no valor kultura ne’e a’ás, tan ne’e labele fasil atu nega lalais no atu desmistifika, ita nia aman nu’udar ita mestri no komandante em xefe,” AXA afirma.

Tanba ne’e, AXA reafirma, ema hotu ne’ebé involve-an iha movimentu tenke konsiente katak misaun prinsipal maka lori vitória ba objetivu ida, la’ós túr de’it hodi mehi naruk maibé atu halibur, organiza no konsolida nafatin mehi lulik, Kayrala Xanana Gusmão nian liuhusi Partidu CNRT nian bá rai no povu ne’e liuhusi eleisaun 2022 no 2023.

“Hala’o servisu bá ho espíritu voluntarizmu, mantein disiplina ba ita nia futuru,” AXA subliña.

Partisipa iha eventu ne’e, AXA ho nia ekipa, reprezentante MEXAN, selekom, veteranu no partisipantes no membru MAPE-KXG. (cao)

No More Posts Available.

No more pages to load.