Majór Moises Guimarães husik Hela Nia Kaben ho Oan Na’in-7

by -16 views

DILI—Majór Infantaria Xefe Divizaun Informasaun Militár /J2, FALINTIL-Forsa Defeza Timor Leste (F-FDTL), Majór Mosés Guimarães alias PIKSY MAU hakotu iis iha loron Kuarta (05/02/2020) iha oras 16.28 lorokraik, iha nia rezidénsia Kampung Tuti, Bebonuk, Dili, deskonfia moras diaria.

Matebian husik hela fen kaben Joana Soares ho oan na’in-7, mane na’in-3 no feto na’in-4.

Biografia – MOISÉS GUIMARÃES – PIKSY MAU

Moisés Guimarães ho kódigu Piksy Mau, moris iha Lore I, Postu Administrativu Lospalos, Munisípiu Lautem, iha loron 15 maiu 1963. Moris husi família agrikultór João Baptista no Lorenço Guimarães. Maun alin hamutuk nain 12. Sa’e ba ai-laran hamutuk ho maun alin nain tolu maibé sira nain tolu mate hotu, hela deit Piksy Mau ne’ebé reziste tinan 24 to’o Timor-Leste ukun rasik-an.

Iha 1974 to’o 1975, frekuenta eskola primária iha Lospalos. Invazaun Indonézia nian ba Timor-Leste iha 7 Dezembru 1975, husik nia la konsege finaliza nia estudu no hela deit ho 2¬a klase. No hahú tama ba Organizasaun Populár Juventude Timor (OPJT) no kontinua enkaixa kedan iha seguransa Auto Defesa Arma Branca, no evakua ba ai-laran halo rezisténsia to’o 1999.

Lakon nia maun alin nain tolu iha ai-laran no nia familia iha vila deztera ba Ataúro no ba Caelaco, halo nia determinadu liu tán atu kontinua funu to’o hetan ukun-rasik-an.

Piksy Mau funu ho postu soldadu to’o 1997. No iha 1998 to’o 1999 asumi kargu Komandante Seksaun.

Rejista mós katak iha1982-1984 Piksy Mau hetan fi’ar nu’udar eskoltu ba Komisáriu Polítiku Maubelis. Hafoin ne’e, involve fali iha grupu Koto Moruk hodi halo ligasaun ho Kruzeiru no Sentru hodi asegura movimentu Komandante em Xefe das Falintil Kay Rala Xanana Gusmão.

Iha tinan 2001, Piksy Mau tama Instituisaun F-FDTL no hafoin liu husi dalan naruk ohin loron hetan diviza Maijór.

Piksy Mau foin forma família iha 2002 no iha oan na’in-hitu. Hanoin fali funu naruk ne’ebé nia halo, nia halo esforsu oioin hodi investe ba nia oan sira nia edukasaun, atu nia oan sira bele kontribui ba nasaun tuir dalan ne’ebé nia hahú tiha ona.

Iha loron 19 Maiu 2007, veteranu Piksy Mau hetan kondekorasaun Orden Gerilla husi Estadu Timor-Leste, rekoñese nia involvemente iha Frente Armada durante tinan 24.

No iha 28 Novembru 2019, hetan kondekorasaun Medalla Ordén Timor-Leste husi Prezidente Repúblika, Francisco Guterres Lú Olo. (cao)