Maioria Estudante Seidauk Simu Matéria Rezumu

husi -263 views
Estudante sira ba simu rezumu matéria aprendizajen. (Foto TP: Caetano) Guterres

(Reportájen Caetano Guterres/Editor Noemio Falcao)

BAUKAU (Timor Post) – Estudante iha Eskola Ensinu Bázika Sentrál 03 Villa-Nova, Munisípiu Baukau, hamutuk 1503 maioria seidauk simu rezumu matéria ba períodu daruak nian tanba balun ta’uk atu la’o sai no balun hela do’ok husi eskola.

Diretór Eskola Ensinu Báziku Sentrál 03 Villa-Nova, Paulino J. Freitas haktuir, matéria rezumu períodu daruak manorin sira prepara hotu ona no agora kontinua iha faze distribuisaun.

Diretór Paulino subliña, matéria ka rezumu ne’ebé iha atu estudante sira bele estuda no bainhira situasaun normal no laiha ona estadu emerjénsia, serka sanitária no konfinamentu obrigatóriu maka eskola bele realiza ona ezame.

“Estudante sira ne’ebé mai ona eskola foti matéria eskola nian foin iha ema na’in atus haat resin de’it sei iha labarik barak mak seidauk mai foti, ita bele dehan foin porsentu 40 mak mai foti matéria,” Diretór Paulino ba Timor Post iha semana kotuk.

Nia hatutan, ba estudante sira ne’ebé seidauk simu matéria rezumu, eskola kontinua fó informasaun ba sira nia maluk estudante ne’ebé durante mai simu matéria hodi hato’o tutan ba sira ninia maluk ne’ebé seidauk tanba loron-loron manorin sira halo rotativa servisu.

“Ami profesór sira loron-loron fahe oráriu halo rotativa mai iha eskola hein estudante sira mai fó matéria ne’ebé profesór sira prepara, ba estudante sira ne’ebé la mai ami kontinua hameno ba sira nia maluk ne’ebé mai tatoli informasaun para sira mai simu, maibé atu eskola organiza mai dala ida labele tanba ita kumpre hela protokolu saúde nian labele halibur ema barak,” Diretór Paulino subliña.

Iha tempu hanesan, estudante sira ne’ebé lakohi fó sai nia naran hatete, sente kontente eskola bele fasilita sira hodi fó rezumu matéria, maibé triste bainhira la hasoru malu ho profesór sira iha aula tanba ladún efetivu.

“Ami sente kontente, ami nia mestre no mestra sira fó ona matéria rezumu maibé sente triste tanba ita haree ba ladún efetivu, ami simu tiha buat balun la komprende atu husu los see,” estudante ne’e preokupa.

Tuir observasaun jornalista nian iha Eskola Ensinu Bázika Sentrál 03 Villa Nova Baukau nota katak, profesór sira ativa halo print matéria hodi kontinua hein estudante sira.(Lee notísia seluk iha jornál Timor Post)