Ma’Huno Bulerek Karataiano Haloot iha Semitériu Espesiál

by -1.664 views
Jardim dos Herois da Pátria, Metinaro, Dili. Foto Espesial

DILI (Timor Post)— Estadu dekreta fó onra fúnebre no hakoi António João Gomes da Costa ‘Ma’Huno Bulerek Karataiano’ iha semitériu espesiál, iha Jardim dos Herois da Pátria iha Metinaro.

Liuhusi komunikadu ba imprensa ne’ebé Timor Post asesu, Segunda (27/09/2021), Prezidente Repúblika, Francisco Guterres Lú Olo,  dekreta ona ho Dekretu Prezidente Repúblika, númeru 80/2021, 27 setembru.

Iha Dekretu Prezidente Repúblika ne’ebé publika ohin, iha Jornal da República, hatete Konstituisaun konsagra rekoñesimentu no valorizasaun ba rezisténsia sekular Povu Maubere kontra dominasaun estranjeira no kontributu ema hotu-hotu ne’ebé luta ba independénsia nasionál. Lei kona-ba Estatutu Kombatentes Libertasaun Nasionál reafirma vontade atu fó omenaje ba esforsu sira ne’ebé manifesta husi Kombatentes Libertasaun Nasionál iha luta ba Independénsia Nasionál.

Haree ba kontribuisaun ba Luta Libertasaun Pátria, Conselho dos Combatentes da Libertação Nacional (CCLN) autoriza António João Gomes da Costa ‘Ma’Huno Bulerek Karataiano’ iha direitu atu hetan onras fúnebre no hakoi iha semitériu espesiál iha  “Jardim dos Herois da Pátria”  Metinaro, nu’udar Kombatentes Libertasaun Nasionál.

Ma’Huno Bulerek Karataiano, nia kontribuisaun iha luta libertasaun Patria, nu’udar Fundadór ASDT, membru Comite Central Fretilin, Chefe Conselho Político Militár Frente Armada, Secretário da Comissão Diretiva da Fretilin, Comandante das FALINTIL, Secretario Região 3, líder ida ne’ebé inspira no besik tebes  ba  foin-sa’e klandestinu sira  iha vila laran, iha Timor-Leste no iha Indonézia.

José António Gomes da Costa Ma’Huno Bulerek Karataiano moris iha 14 Abril 1949. Iha 24 setembru 2021 nia is kotu iha Hospital Nasionál Guido Valadares tanba moras stroke.

Tuir ajenda Saudozu Ma’Huno haloot iha loron Tersa (28/09/2021). (cao)

No More Posts Available.

No more pages to load.